निषेधाज्ञाले वीरगन्जमा नयाँ वर्ष प्रभावित

वीरगन्ज (पर्सा) : हनुमान जयन्तीका अवसरमा शनिवार निकालिएको शोभा यात्राका क्रममा उत्पन्न विषम परिस्थिति नयाँ वर्ष वीरगन्जमा प्रभावित भएको छ । गत चैत ३० गते हनुमान जयन्तीको अवसरमा निकालिएको शोभा यात्रा दुई समूहबिचको झडपपछि नियन्त्रणका लागि लगाइएको निषेधाज्ञा (कफ्र्यू)आदेशको कारणले वीरगन्जवासीको नयाँ वर्ष अन्य वर्षको जस्तै मनाउन पाएनन् । नयाँ वर्ष लक्षित गरेर वीरगन्ज महानगरले आयोजना गरेको रात्रि बजार पनि निषेधाज्ञाको कारणले शनिवार र आइतबार दुई दिन सञ्चालन नपाएपछि स्थगित गरिएको छ । होटल तथा पर्यटन व्यवसायी सङ्घ पर्साकाका अध्यक्ष हरि पन्तले वीरगन्जमा उत्पन्न भएको विषम परिस्थितिको कारणले ‘बुकिङ’ भएका होटल पनि धमाधम खाली भएको जानकारी दिनुभयो । ‘‘नयाँ वर्ष मनाउन आएका भारतीय पाहुना पनि निषेधाज्ञाको कारणले होटल छाडेर फर्किनुभएको छ,’’ उहाँले भन्नुभयो,‘‘ नयाँ वर्ष मनाउन आएका पाहुनापछि एकाएक छाडेर जाँदा यहाँको पर्यटन व्यवसायी झनै धराशायी हुने अवस्थामा पुगेको छ ।’’ अध्यक्ष पन्तले नेपाली नयाँ वर्षको ‘इभ’ तथा नयाँ वर्षको दिन वीरगन्जका होटल भारतीय पाहुना तथा स्वदेशी पर्यटकले भरिभराउ हुने गर्दथ्यो । तर,अहिले भने निषेधाज्ञा आदेशको कारणले कोही पनि व्यक्ति घरबाट निस्किन पाइरहेका छैनन् । नयाँ वर्षको पूर्व सन्ध्यामा निषेधाज्ञा चैत ३० गते बेलुका ६.३० बजेदेखि चैत ३१ गते रातको १२ बजेसम्म निरन्तर रूपमा निषेधाज्ञा जारी भएको थियो । उहाँले नयाँ वर्षको पूर्व सन्ध्यामा वीरगन्जका होटल ५५ प्रतिशत ‘अंकुपेन्सी’ भएको भए पनि अहिले पाहुना होटल खाली गरेर छाडेर गएको दाबी गर्नुभयो । वीरगन्जमा भारतीय तथा अन्य मुलुकका पर्यटकलाई लक्षित गरेर क्यासिनोसहितका सुविधा सम्पन्न तारे होटल पनि सञ्चालनमा रहेका छन् । वीरगन्जका तारे होटेलमा दियालो लडर्स प्लाजा, भिष्वा, क्लार्क रिसोर्ट, सुरज होटल लगायतका रहेका छन् । वीरगन्ज बजार क्षेत्रमा मात्रै साना ठुला गरेर ८५ भन्दा धेरै होटल तथा लज रहेका छन् । ‘‘बन्द हडतालको कारणले होटलमात्रै नभएर सबै खालका व्यापार व्यवसायमा प्रत्यक्ष असर पार्दै आइरहेका छन्,’’ उहाँले भन्नुभयो,‘‘बन्द ,हडताल , निषेधाज्ञा लगायतका गतिविधि सधैँका लागि बन्द गर्नुपर्नेमा यस्तो गतिविधि हुँदा पर्यटन क्षेत्र नराम्रोसँग प्रभावित हुने गरेको छ ।’’ एकातर्फ व्यापारिक तथा औद्योगिक सहरको छायाँ र अर्कोतर्फ पर्यटकीय गन्तव्यको प्रचारप्रसारको कमीको कारणले पनि वीरगन्जमा अपेक्षाकृत पर्यटक भित्रिन सकिरहेका छैनन् । सीमावर्ती रक्सौल नाका हुँदै मासिक हजारौँको सङ्ख्यामा भारतीय पर्यटक नेपाल आइरहेका हुन्छन् । आकर्षक गन्तव्यको अभावमा भारतीय पर्यटकलाई वीरगन्ज आसपासको क्षेत्रमा रोक्न सकिएको छैन । जसले गर्दा यहाँको पर्यटन क्षेत्रमा प्रत्यक्ष प्रभाव पर्दै आइरहेको छ । भारतको रक्सौल नाका हुँदै नेपाल प्रवेश गर्ने भारतीय पर्यटकले वीरगन्जलाई केबल बाटोका रूपमा मात्रै प्रयोग गर्दै आइरहेका छन् । जसका कारणले वीरगन्जको पर्यटन क्षेत्रले त्यसको लाभ उठाउन सकिरहेका छैनन् । त्यही समस्यालाई मध्यनजर गर्दै वीरगन्ज महानगरपालिकाले वीरगन्ज नाका हुँदै नेपाल प्रवेश गर्ने भारतीय पर्यटकलाई कम्तीमा पनि दुई रात पर्सा आसपासकै क्षेत्रमा बसोबास गर्ने वातावरण सिर्जना गर्नेतर्फ ध्यान दिइरहेको जनाएको छ । वीरगन्जमा करिब १० अर्ब भन्दा धेरै लागतमा तारे तथा अन्य होटल सञ्चालनमा रहेका छन् ।