गाजामा इजरायली हवाई आक्रमणमा ८० जनाको मृत्यु

काठमाडौं : गाजामा इजरायली सेनाले गरेको पछिल्लो हवाई आक्रमणमा कम्तीमा ८० जनाको ज्यान गएको छ।

उत्तरपश्चिम गाजाको जबालिया क्षेत्रमा भएको हमलामा इन्डोनेसियाली अस्पतालका अनुसार ५० जनाको मृत्यु भएको छ, जसमा २२ बालबालिका र १५ महिला रहेका छन्। त्यस्तै, नजिकैको अल-अव्दा अस्पतालले थप ९ जनाको शव प्राप्त गरेको जनाएको छ, जसमध्ये ७ बालबालिका छन्।

इजरायली सेनाले हमास र प्यालेस्टिनी इस्लामिक जिहादका लडाकुहरूलाई लक्षित गरी आक्रमण गरिएको दाबी गरेको छ।

मंगलबारदेखि इजरायलतर्फ रकेट आक्रमण बढेपछि जबालिया र आसपासका बासिन्दालाई क्षेत्र खाली गर्न आग्रह गरिएको थियो।

यसैबीच, संयुक्त राष्ट्रसंघका मानवीय सहयोग प्रमुख टोम फ्लेचरले गाजामा भइरहेको नरसंहार रोक्न तत्काल कदम चाल्न सुरक्षा परिषद्का सदस्य राष्ट्रहरूलाई आग्रह गरेका छन्।