कोरियाली नागरिक रक्सौलबाट पक्राउ, अवैध रूपमा नेपाल प्रवेश प्रयास

बिरगञ्ज : भारतको बिहारस्थित रक्सौल नाकाबाट नेपाल प्रवेश गर्न खोजिरहेका एक दक्षिण कोरियाली नागरिक पक्राउ परेका छन्।

पक्राउ पर्ने व्यक्ति दक्षिण कोरियाको क्योङ की डो प्रान्त निवासी किम याङ डेल रहेका छन्। उनी आइतबार नेपाल प्रवेश गर्न खोज्दा सीमामा सुरक्षाकर्मीले नियन्त्रणमा लिएका हुन्।

पूर्वी चम्पारणका प्रहरी उपरीक्षक स्वर्ण प्रभातका अनुसार, किम याङ डे सन् २०१७ मा भारत प्रवेश गरेका थिए तर उनको भिसाको म्याद सन् २०२१ को जनवरीमै सकिएको थियो। त्यसपछि उनी भारतमा अवैध रूपमा बस्दै आएका थिए। सोधपुछमा उनले आफू चेन्नईमा काम गरिरहेको बताएका छन् भने नक्कली आधार कार्डसमेत बनाएको खुलेको छ।

अधिकारीहरूले बताएका छन् कि पक्राउपछि उनको विरुद्ध मुद्दा दर्ता गरिएको छ र अनुसन्धान जारी छ। साथै, सम्बन्धित अन्य सुरक्षा निकायहरूलाई समेत गिरफ्तारीबारे जानकारी गराइएको छ।