सुनसरी, मोरङ, झापा, धनकुटा लगायतका जिल्लामा भारी वर्षा : उच्च सतर्कता अपनाउन आग्रह

सुनसरी : यस वर्षको मनसुन कोशी प्रदेशबाट भित्रिए सँगै कोशी प्रदेशको सुनसरी,मोरङ,झापा,धनकुटा लगायतका जिल्लामा हाल भारी मात्रामा वर्षा भइरहेको छ ।

 पूर्वानुमान महाशाखाले इलाम, झापा, मोरङ, सुनसरी र धनकुटाका विभिन्न क्षेत्रमा वर्षा भइरहेको जनाएको छ। महाशाखाले आज बिहान एक सूचना प्रकाशित गर्दै ती जिल्लाहरूमा धेरै स्थानमा भारी वर्षा मापन भइसकेको र दिउँसोसम्म अझै थप वर्षा हुने सम्भावना रहेको जनाएको हो।

महाशाखाका अनुसार निरन्तर वर्षाका कारण मेची, विरिङ, निन्दा, कनकाई, चिसा खोला, मावा-रतुवा, लोहन्द्रा, बक्राहा, नुन खोला लगायतका साना नदी तथा खोलाहरूमा बाढी सतर्कता तहसम्म पुग्ने सम्भावना रहेको छ।

तसर्थ, ती क्षेत्र वरपरका बासिन्दालाई विशेष सावधानी अपनाउन, नदी किनारमा नजान, र आवश्यक परे सुरक्षित स्थानतर्फ जान सुझाव दिइएको छ।

महाशाखाले दिउँसोसम्म वर्षाको सम्भावना कायमै रहेको भन्दै जोखिम क्षेत्रका नागरिकलाई सतर्क रहन पुनः आग्रह गरेको छ।