रोमाञ्चक खेलमा पाकिस्तान शाहिन्ससँग एक रनले पराजित हुँदै नेपाल 'टप इन्ड टी–२० सिरिज'बाट बाहिरियो

अस्ट्रेलियामा जारी टप इन्ड टी–२० सिरिज अन्तर्गत नेपाल पाकिस्तान शाहिन्ससँग रोमाञ्चक खेलमा एक रनले पराजित भएको छ।

१४५ रनको लक्ष्य पछ्याएको नेपालले निर्धारित २० ओभरमा ७ विकेट गुमाएर १४३ रन मात्र बनाउन सक्यो।

नेपालका लागि कप्तान रोहित पौडेलले सर्वाधिक ५२ रनको अर्धशतकीय पारी खेले। त्यस्तै दिपेन्द्र सिंह ऐरी अविजित ४१ रन बनाए भने आसिफ शेखले २७ र लोकेश बमले १० रनको योगदान गरे। पाकिस्तान शाहिन्सका मुहम्मद वासीम जुनियरले २ विकेट लिए।

यसअघि टस जितेर ब्याटिङ थालेको पाकिस्तान शाहिन्सले २० ओभरमा ९ विकेट गुमाउँदै १४४ रन बनाएको थियो। पाकिस्तानका लागि इरफान खान नियाजले अविजित ४२ रन, अब्दुल सामदले २६, मुहम्मद वासीम जुनियरले २३ र यासिर खानले १८ रन जोडे।

नेपालका बलरमध्ये सोमपाल कामीले ३ विकेट लिए भने नन्दन यादव र दिपेन्द्र सिंह ऐरीले २–२ तथा कुशल भुर्तेलले १ विकेट हात पारे।

यो हारसँगै नेपाल टप इन्ड सिरिजबाट बाहिरिएको छ भने पाकिस्तान शाहिन्स सेमिफाइनलमा प्रवेश गर्न सफल भएको छ।