झापामा पानीमा डुबेर महिलाको मृत्यु

झापा : झापाको कचनकवल गाउँपालिका–२ रतिबारीमा पानीमा डुबेर एक महिलाको मृत्यु भएको छ।

आज साँझ करिब ५ बजे ४६ वर्षीया उजारु राजवंशी मृत अवस्थामा फेला परेकी हुन्। उनी उखारू राजवंशीकी पत्नी हुन्।

स्थानीयका अनुसार घरदेखि करिब १५० मिटर पश्चिमतर्फ रहेको झारु राजवंशीको खेतमा माटो निकाल्न खनिएको गहिरो खाल्डोमा जमेको पानीमा डुबेर उनको मृत्यु भएको हो। घटनाबारे जानकारी पाएपछि जिल्ला प्रहरी कार्यालय झापाबाट प्रहरी अधिकृतसहितको टोली घटनास्थल पुगेको थियो।

प्रहरीले आवश्यक कानुनी प्रक्रिया पूरा गरी शवलाई पोष्टमार्टमका लागि प्रादेशिक अस्पताल भद्रपुर पठाएको जनाएको छ। यस सम्बन्धमा थप अनुसन्धान जारी रहेको प्रहरीले जानकारी दिएको छ।