नबिल बैंकका ग्राहकलाई अब एनबैंक एपमार्फत डाटा ई–सिम र अन्तर्राष्ट्रिय ड्राइभिङ परमिट सेवा

काठमाडौँ : नबिल बैंक लिमिटेड र निम्बजबीच डाटा ई–सिम तथा अन्तर्राष्ट्रिय ड्राइभिङ परमिट सेवाका लागि समझदारीपत्रमा हस्ताक्षर भएको छ। यससँगै नबिल बैंकका ग्राहकले एनबैंक मोबाइल एपमार्फत विश्वका विभिन्न मुलुकका लागि यी सेवाहरू लिन सक्ने भएका छन्।

बैंकका तर्फबाट नायब प्रमुख कार्यकारी अधिकृत आदर्श बाजगाईँ र निम्बजका निर्देशक ऋषभ तिमिल्सिनाले सम्झौतापत्रमा हस्ताक्षर गरेका थिए। सम्झौताअनुसार अब चीन, भारत, अमेरिका, अष्ट्रेलिया, दुबई, थाइल्यान्ड, कतार, जापान, कोरिया, इटाली, फ्रान्स, क्यानाडा सहित २०० भन्दा बढी देशमा प्रयोजन हुने डाटा ई–सिम एनबैंक एपमार्फत खरिद गर्न सकिनेछ।

नबिल बैंकका नायब प्रमुख कार्यकारी अधिकृत बाजगाईँका अनुसार विदेश जाने क्रममा इन्टरनेट सेवामा हुने समस्या, सिम खरिद गर्दा केवाइसी फारम भर्ने झन्झट तथा विदेशी मुद्रा बुझाउनुपर्ने बाध्यतालाई हटाउन यो पहल गरिएको हो। ग्राहकले एपमार्फत सजिलै आफू अनुकूलको डाटा प्याकेज खरिद गर्न सक्ने सुविधा पाउनेछन्।

यससँगै एनबैंक एपमार्फत अन्तर्राष्ट्रिय ड्राइभिङ परमिट पनि लिन सकिनेछ। संयुक्त राष्ट्रसंघको मापदण्डअनुसार तयार हुने यो अनुमतिपत्र १९० भन्दा बढी देशमा मान्य हुनेछ। ग्राहकले एपमार्फत १० मिनेटमै आवेदन दिन सक्नेछन्। चालक अनुमति पत्र अपलोड गरेपछि २४ घण्टाभित्र विद्युतीय परमिट उपलब्ध हुनेछ। यो डिजिटल वा फिजिकल कार्ड दुवै स्वरूपमा प्राप्त गर्न सकिनेछ।

निम्बजका निर्देशक तिमिल्सिनाले यो सेवाले विद्यार्थी, वैदेशिक रोजगारीमा जाने र अन्तर्राष्ट्रिय यात्रुहरूलाई सहज र तनावमुक्त आवागमनमा मद्दत गर्ने विश्वास व्यक्त गरे।

निम्बज एक सुपरएप हो जसमा च्याट, भिडियो कल, सामाजिक सञ्जाल, लाइभ स्ट्रिमिङ, किनमेल, ओटीटी मूभी, डिजिटल वालेट, क्विज, गेमलगायतका सुविधाहरू एकै प्लेटफर्ममा उपलब्ध छन्। नबिल बैंक भने २५ लाखभन्दा बढी सेवाग्राहीलाई २६८ शाखा र ३२१ एटिएममार्फत सेवा दिँदै आएको छ। चार दशकदेखि नबिलले नेपाली बैंकिङ क्षेत्रमा नयाँ–नयाँ सेवाको सुरुवात गर्दै आएको छ।