गायिका एलिना चौहानले प्रताप दासलाई दाइ भन्दै दिइन् स्पष्टीकरण

काठमाडौं : पछिल्लो समयकी चर्चित गायिका एलिना चौहान फेरि एकपटक चर्चामा आएकी छन्। पूर्वपति विष्णु सापकोटासँग डिभोर्सपछि निजी जीवनका कारण चर्चामा रहेकी उनी हाल अमेरिकामा सांगीतिक कार्यक्रममा सहभागी छिन्।

‘अमेरिका टुर’ मा चौहानसँगै गायक बद्री पंगेनी, गायिका कला लम्साल र गायक प्रताप दास पनि सहभागी छन्। कार्यक्रमसँगै उनीहरूले सामाजिक सञ्जालमा रमाइला क्षणहरू समेत साझा गरिरहेका छन्।

तर, सामाजिक सञ्जालमा आएका केही प्रतिक्रियाले चौहानलाई विवादमा ल्याएको छ। प्रताप दाससँगको मित्रतापूर्ण सम्बन्धलाई कपलको रूपमा व्याख्या गरिएको प्रतिक्रियापछि उनले स्पष्ट प्रतिक्रिया दिएकी छन्।

सामाजिक सञ्जालमा भिडियोसहित उनले लेखेकी छन्, “प्रताप दास मेरो दाइ हुनुहुन्छ, र हामीबीचको सम्बन्ध दाजु–बहिनीको माया र सम्मानमा आधारित छ। कृपया अनावश्यक कपल कमेन्ट नगरी कलाकारिता र सम्बन्धको इज्जत गर्न सहयोग गर्नुहोला।”

उनको यस स्पष्टीकरणपछि सामाजिक सञ्जालमा आएका हल्लाबारे स्पष्टता आएको छ भने उनका प्रशंसकले कलाकारको निजी जीवन र सम्बन्धलाई सम्मान गर्नुपर्ने प्रतिक्रिया दिएका छन्।