रुपन्देही–३ उपनिर्वाचनमा रास्वपाबाट डा. लेखजंग थापा उम्मेदवार

काठमाडौँ : राष्ट्रिय स्वतन्त्र पार्टी (रास्वपा)ले रुपन्देही क्षेत्र नम्बर ३ को उपनिर्वाचनका लागि डा. लेखजंग थापालाई उम्मेदवार घोषणा गरेको छ।

पार्टी सचिवालय बैठकले ९ जना आकांक्षीमध्ये थापालाई छनोट गरेको हो। आकांक्षीमध्ये सुलभ खरेल, ज्ञानु पौडेल, जितबहादुर गुप्ता, मधुप्रसाद अर्याल, पार्थिवेन्द्र उपाध्याय, कुसुम महर्जन, पुनमकुमारी अग्रवाल र रचना क्षेत्री रहेका थिए।

उम्मेदवार चयनका लागि रास्वपाले भदौ १२ गते बिहान ७ बजेदेखि साँझ ७ बजेसम्म प्राइमेरी इलेक्सन गरेको थियो। अनलाइन भोटिङमार्फत सबैभन्दा बढी मत पाएको उम्मेदवारलाई पार्टीले अन्तिम उम्मेदवारका रूपमा घोषणा गरेको दाबी गरेको छ।

डा. थापा वरिष्ठ न्युरोलोजिस्ट हुन्। उनले एमबीबीएस, इन्टरनल मेडिसिनमा एमडी र न्युरोलोजीमा एमडी गरेका छन्। हाल उनी काठमाडौंको महाराजगञ्जस्थित नेसनल न्युरो सेन्टरमा न्युरोलोजी विभाग प्रमुखका रूपमा कार्यरत छन्। साथै, उनी नेपाल स्ट्रोक एसोसिएसनका संस्थापक अध्यक्षसमेत हुन्।