पुहाँतु जनज्योतिमा प्रधानाध्यापक नियुक्ति विवाद,अध्यक्षले मागे शिक्षकसँग ५० लाख रुपैयाँ घुस

झापा । झापाको भद्रपुर नगरपालिकामा रहेको एक विद्यालय व्यवस्थापन समिति अध्यक्षले ५० लाख रुपैयाँ घुस मागेको अडियो सार्वजनिक भएको छ । भद्रपुर नगरपालिका ९ मा रहेको पुहाँतु जनज्योति माध्यमिक विद्यालय व्यवस्थापन समितिका अध्यक्ष परमानन्द मिश्रले सोही विद्यालयका शिक्षकसँग ५० लाख रुपैयाँ घुस मागेको अडियो सार्वजनिक भएको हो । अध्यक्ष मिश्रले शिक्षक द्वय सृजना प्रसाई र डिल्लीराम अधिकारीसँग ५० लाख रुपैयाँ घुस मागेको खुलेको हो । विद्यालय व्यवस्थापन समितिले निमावि तहमा कार्यरत शिक्षक शिवप्रसाद पोखरेललाई प्रधानाध्यापक नियुक्त गरेसँगै शिक्षक द्वय प्रसाई र अधिकारीले व्यवस्थापन समितिको निर्णय विरुद्ध अदालत गएका थिए । व्यवस्थापन समितिले २०७८ फागुन १२ पोखरेललाई प्रधानाध्यापकमा नियुक्त गर्ने निर्णय गरेको थियो । सो निर्णय विरुद्ध मावि तहकी शिक्षक प्रसाईले उच्च अदालत इलाममा रिट दायर गरेकी थिइन् । उक्त रिटमा अन्तरिम आदेश जारी गर्दै अदालतले पोखरेललाई प्रधानाध्यापकका रूपमा काम नगर्नु भनेको थियो । अदालतको अन्तरिम आदेशपछि मावि तहकी शिक्षक कौशल्यादेवी आचार्यलाई व्यवस्थापन समितिले २०७९ असोज ३० गते प्रधानाध्यापक नियुक्त गर्ने अर्को निर्णय गरेको थियो । विद्यालयले मावि तहकी वरिष्ठतम शिक्षक आचार्यलाई प्रधानाध्यापक नियुक्ति गरेको निर्णय अदालतमा पठाएपछि सो सम्बन्धीको रिट अदालतले खारेज गरेको थियो । व्यवस्थापन समितिको निर्णय विरुद्ध अदालत गएर समितिको निर्णय उल्टाएको भन्दै पुहाँतु जनज्योति माविका व्यवस्थापन समितिका अध्यक्ष मिश्रले विद्यालयका स्थायी शिक्षक द्वय प्रसाई र अधिकारीलाई वैशाख ५ गतेदेखि हाजिर गर्न रोक लगाएका थिए । मावि शिक्षक प्रसाई र प्रावि शिक्षक अधिकारीले ५० लाख रुपैयाँ जम्मा गरे हाजिर गर्न दिने अध्यक्ष मिश्रले बताएको अडियो रेकर्ड सार्वजनिक भएसंगै अध्यक्षको कर्तुत खुलेको हो । व्यवस्थापन समिति अध्यक्ष मिश्र पूर्व श्रोत व्यक्ति समेत हुन् । मिश्रले एक जना शिक्षक नेतालाई फोनमार्फत ५० लाख दिए विद्यालयमा शिक्षक द्वयलाई नै हाजिर गर्न दिने बताएको अडियो मा उल्लेख छ । प्रदेश खबरसँग कुराकानी गर्दै व्यवस्थापन समिति अध्यक्ष मिश्रले घटनाको ढाकछोप गर्दै आफूले कुनै प्रसङ्गमा सो विषय बोलेपनि त्यसमा सत्यता नरहेको बताए । ‘एउटा कुरा म सरलाई भन्छु, ५० लाख रुपैयाँ जम्मा गरुन्, माफ माग्नु सब थोक हुन्छ ल’ अध्यक्ष मिश्रले अडियोमा भनेका छन् । शिक्षक प्रसाई र अधिकारीलाई लक्षित गर्दै टेलिफोन कुराकानीमा मिश्रले भनेका छन् – ‘तिनीहरू हुन चैँ को ?, म अब कुनै कुरा सुन्दिन, मर्नु पर्छ अनि मात्रै हुन्छ नत्र केही हुँदैन ।’  अध्यक्ष मिश्रले भनेका छन् – अन्यथा शिक्षक प्रसाई र अधिकारीलाई कुनै हालतमा विद्यालयमा हाजिरी हुन नदिने दाबी गरेका छन् । मिश्रले पैसा दिन नसक्ने भए अरू तिरै सरुवाको व्यवस्था मिलाउन समेत  शिक्षक नेतालाई आग्रह गरेको अडियो मा उल्लेख छ । विद्यालयमा मावि शिक्षक हुँदा हुँदै अध्यक्ष मिश्रकै जोड बलमा कानुन विपरीत निमावि तहका शिक्षक पोखरेललाई प्रधानाध्यापक नियुक्त गरेको बताइएको छ । आफ्नो निर्णय विरुद्ध अदालत गएको भन्दै व्यवस्थापन समिति अध्यक्ष मिश्रले शिक्षक द्वयलाई शैक्षिक सत्रको पहिलो दिन नै हाजिर हुन नदिएको पीडित शिक्षकको भनाई छ । अध्यक्ष मिश्रले आफैँ विद्यालयमा उपस्थित भएर आफूहरूलाई हाजिर गर्न नदिएको उनीहरूको भनाई छ । त्यस यता हरेक दिन अध्यक्ष मिश्र स्वयम विद्यालय आउने र हाजिर गर्न नदिने गरेको पीडित  शिक्षक प्रसाईले बताएका छन् । प्रसाई र अधिकारीले कानुनी रूपमा सही कुरा उठाएको भन्दै अन्य तीन जना शिक्षकले समेत सोही दिनदेखि हाजिर गरेका छैनन् । विद्यालयमा कार्यरत शिक्षक सुमित्रा पौडेल, कमला राई र शर्मिला अधिकारीले विद्यालय प्रशासनले प्रसाई र अधिकारीलाई हाजिर नगराउन्जेल आफूहरूले समेत हाजिर नगर्ने बताएका छन् । विद्यालयले हाजिर गर्न नदिए पनि सो विद्यालयमा कार्यरत पाँचै जना शिक्षकले सादा कागजमा हाजिरी गरेर नियमानुसार दैनिक विद्यालयमा आफ्नो उपस्थिति जनाइरहेका छन् । विद्यालय प्रशासन र व्यवस्थापन समितिले पाँचै जना शिक्षकलाई शिक्षक कक्षमा रोक लगाउँदै ताला लगाएको छ । शिक्षक कक्षमा ताला लगाइए पछि पाँचै जना शिक्षक खुल्ला चौरमा बस्न बाध्य छन् ।  विद्यालयका अन्य शिक्षकलाई भने प्रधानाध्यापक र सहायक प्रधानाध्यापकसँगै प्रशासन कक्षमा बस्न निर्देशन दिइएको छ ।