दशैंलाई लक्षित गरी प्रदर्शन गरिएका चलचित्रको व्यापार कस्तो छ ?

काठमाडौँ : दशैंको अवसरमा तीन नेपाली चलचित्र प्रदर्शनमा आएका छन्। फूलपाती अर्थात् असोज १३ गतेदेखि चलचित्र ‘हरिबहादुरको जुत्ता’, ‘माइतीघर’ र ‘बलिदान’ नेपालभर प्रदर्शनमा आएका छन्।

दशैंको बिदा भए पनि तीनै चलचित्रले घरेलु बजारमा अपेक्षाकृत व्यापार गर्न सकेका छैनन्। चलचित्र विकास बोर्डको ‘बक्सअफिस २ सिनेमा’ एपका अनुसार, चलचित्र ‘बलिदान’ले दुई दिनमा एक करोड पाँच लाख ६५ हजार रुपैयाँ व्यापार (ग्रस कलेक्सन) गरेको तथ्याङ्क छ।

चलचित्रले पहिलो दिन असोज १३ गते नेपालभर २४४ ‘शो’बाट ५७ लाख १९ हजार ३४० रुपैयाँ र दोस्रो दिन २१३ शोबाट ४८ लाख ४६ हजार रुपैयाँको व्यापार गरेको छ।

सन्तोष सेनको निर्देशनमा बनेको चलचित्र ‘बलिदान’मा समीर भट्ट, सौगात मल्ल, अर्पण थापा, ऋचा शर्मा लगायतका कलाकारले अभिनय गरेका छन्।

यस्तै, अभिनेता हरिवंश आचार्यले शीर्ष भूमिका निर्वाह गरेको चलचित्र ‘हरिबहादुरको जुत्ता’ले प्रदर्शनको दुई दिनमा ५९ लाख ५८ हजार रुपैयाँको व्यापार (ग्रस कलेक्सन) गरेको छ।

चलचित्रले असोज १३ गते १३४ शोबाट २४ लाख ८५ हजार ६४ रुपैयाँ र दोस्रो दिन ३४ लाख ७३ हजार रुपैयाँको व्यापार गरेको छ। चलचित्रले पहिलो र दोस्रो दिन समान ‘शो’ पाएको छ।

दीपेन्द्रकुमार खनालको निर्देशनमा बनेको चलचित्र ‘हरिबहादुरको जुत्ता’मा अभिनेता आचार्यसँगै स्वस्तिमा खड्का, प्रकाश सपुत, प्रियङ्का कार्की, हरिहर शर्मा, दिव्य देव, किरण केसी, राजाराम पौडेललगायतका कलाकारले अभिनय गरेका छन्।

अभिनेता आचार्यले टेलिशृङ्खला र रङ्गमञ्चमा निर्वाह गरेको चर्चित पात्र ‘हरिबहादुर’लाई यसपटक चलचित्रमा ल्याएका हुन्।

प्रदर्शनमा आएको तेस्रो चलचित्र ‘माइतीघर’ले दुई दिनमा ३८ लाख ६३ हजार रुपैयाँको व्यापार (ग्रस कलेक्सन) गरेको छ। चलचित्रले असोज १३ गते पहिलो दिन १४४ ‘शो’बाट १८ लाख ९६ हजार ४५५ रुपैयाँ र दोस्रो दिन १३० ‘शो’बाट १९ लाख ६७ हजार रुपैयाँको व्यापार गरेको छ।

रोहित अधिकारीले निर्माण र मिलन तामाङले निर्देशन गरेको चलचित्रमा केदार घिमिरे, उपासनासिंह ठकुरी, धीरज मगर, प्रकाश सपुतलगायतका कलाकारले अभिनय गरेका छन्।

पछिल्ला वर्षमा दशैंमा नेपाली चलचित्रको व्यापार राम्रो भएको पाइन्छ। त्यसै कारण यस दशैंमा तीन चलचित्रले प्रदर्शन मिति तय गरेका हुन्। बिदाको समयमा चलचित्रले राम्रो प्रतिक्रिया पाएमा व्यापार बढ्ने अपेक्षासहित चाडपर्व केन्द्रित प्रदर्शन बढेको चलचित्रकर्मीले बताएका छन्।