धरान आएर कुलमानले भने,‘एक अर्कामा हिलो छ्याप्ने काम नगरौँ’

धरान : ऊर्जा, जलस्रोत तथा सिँचाइ, भौतिक पूर्वाधार तथा यातायात तथा सहरी विकास तीनवटा मन्त्रालयको जिम्मेवारी सम्हाल्दै आएका मन्त्री कुलमान घिसिङले देश परिवर्तनका लागि नयाँ सोचका वैकल्पिक शक्ति एकताबद्ध भएर अघि बढ्नुपर्नेमा जोड दिएका छन् ।

आज धरानमा आयोजित चौथो ‘१० करोड बज्रगुरु जप, १२ सय प्राचीन अष्टगुरु रिन्पोछे लिला विश्व शान्ति पूजा तथा ङ्युङ्ने व्रत–२०८२’ लाई सम्बोधन गर्दै मन्त्री घिसिङले एक अर्कालाई गालीगलौज र दुष्प्रचार होइन, सहकार्य र सामूहिक प्रयासले मात्र देश समृद्धितिर अघि बढ्ने बताए ।

उनले भने,‘हामी एक अर्कालाई गाली गरेर होइन, एकजुट भएर अघि बढ्नु आजको आवश्यकता हो। सबै एक भएर अघि बढ्दा मात्र देश समृद्धितिर जान्छ ।’

आगामी निर्वाचनलाई ‘देश परिवर्तनको ठूलो अवसर’ भन्दै मन्त्री घिसिङले नागरिकलाई सही नेतृत्व चयन गर्न आग्रह गरे । उनका अनुसार, देशलाई अन्धकारबाट हटाएर उज्यालोतर्फ लैजान योग्य नेतृत्व छान्नुपर्छ । त्यो जिम्मा जनताको काँधमा छ । सही व्यक्ति सही समयमा सही स्थानमा पुग्यो भने देश विकास हुन्छ ।

राजनीतिक परिवर्तन मात्र पर्याप्त नभएको बताउँदै उनले समृद्ध राष्ट्र निर्माणका लागि सुशासन, पारदर्शिता, भ्रष्टाचार नियन्त्रण, सामाजिक न्याय र युवाका लागि रोजगारी अपरिहार्य रहेको उल्लेख गरे ।

मन्त्री घिसिङले नेपालको दीर्घकालीन स्थायित्वका लागि निर्वाचन सफलतापूर्वक सम्पन्न गर्नु अहिलेको सरकारको प्रमुख दायित्व रहेको भन्दै सबै पक्षलाई सहकार्यका लागि आह्वान गरेका छन् ।