अख्तियारले गर्यो सात जनाविरुद्ध भ्रष्टाचार मुद्दा दायर

काठमाडौँ : अख्तियार दुरुपयोग अनुसन्धान आयोगले कपिलवस्तुको मायादेवी गाउँपालिकामा सरसफाइ गर्नुपर्ने पेस्की रकम हिनामिना गरेको आरोपमा सात जनाविरुद्ध विशेष अदालतमा भ्रष्टाचार मुद्दा दायर गरेको छ।

आयोगले जारी गरेको विज्ञप्तिअनुसार पुरानो पेस्की फछ्र्यौट नगरी नियमविपरीत पुनः पेस्की उपलब्ध गराई आपसी मिलेमतोमा सरकारी रकम हिनामिना गरेको ठहरपछि तत्कालीन प्रमुख प्रशासकीय अधिकृतहरू रामचन्द्र ढकाल, कृष्णप्रसाद तिमिल्सिना, परमेश्वर यादवसहित लेखा अधिकृत प्रकाश गौतम, लेखापाल तुलसीराम पौडेल, लेखा सहायक गिरिराज गौतम र अधिकृत छैटौँ परमेश्वर यादवविरुद्ध मुद्दा दायर गरिएको हो।

आयोगका अनुसार यादवले स्वास्थ्यसम्बन्धी विभिन्न कार्यक्रमका लागि लिएको पेस्कीमध्ये आर्थिक वर्ष २०७५/७६ देखि २०७८/७९ सम्मको ४६ लाख ७ हजार रुपैयाँ न त बिल–भर्पाई पेश गरे, न त फिर्ता नै गरे। आयोगले हिनामिना भएको सम्पूर्ण रकम असुल–उपर गर्न र भ्रष्टाचार निवारण ऐन, २०५९ बमोजिम कैद तथा जरिवानाको मागसहित मुद्दा दायर गरेको छ।