एमाले महाधिवेशन : सुनसरी–२ मा जिल्ला सचिवसहित मेयर–उपमेयर नै पराजित

इटहरी : नेकपा एमालेको आसन्न ११औँ महाधिवेशनका लागि सुनसरी क्षेत्र नम्बर २ मा भएको प्रतिनिधि छनौटमा हेभिवेट नेताहरू नै पराजित भएका छन् । शनिवार सम्पन्न भएको मतदानमा एमाले सुनसरीका जिल्ला सचिव राम कोइराला, रामधुनी नगरपालिकाका मेयर शंकरलाल चौधरी र उपमेयर तारा थापा समेत पराजित भएका हुन् ।

यस्तै इटहरीका रामप्रसाद चौलागाईं, एमालेकी पूर्व जिल्ला सदस्य कमला खडका, मिथिला पोखरेल र हालका जिल्ला सदस्यहरू गायत्री लम्साल, केदार न्यौपाने, सिर्जना नेपाली, भिमाकुमारी तुम्बाहाम्फे समेत पराजित भएका भएका छन् ।

खुला तर्फका ४ सिटका लागि १२ जनाबिच कडा प्रतिस्पर्धा हुँदा सचिव कोइरालासहित प्रभावशाली मानिँदै आएका स्थानीय शीर्ष पदाधिकारीहरूसम्म विजय टाढा रह्यो । 

छनौटमा कोशी प्रदेशका आन्तरिक मामिला तथा कानूनमन्त्री रेवतीरमण भण्डारी, एमाले जिल्ला अध्यक्ष परशुराम यादव, खेमराज पोखरेल, डेगराज फुयाँल, लोकेश निरौला विजयी भएका छन् ।

महिलातर्फ पूर्वमुख्यमन्त्री भीम आचार्यकी श्रीमती निरादेवी खनाल आचार्य, मन्दिरा भट्टराई र रञ्जु सिग्देल विजयी हुँदै महाधिवेशन प्रतिनिधि बन्न सफल भएका छन् ।