हातेमालो सहकारीले गर्‍यो उत्कृष्ट कृषक र विद्यार्थीलाई सम्मान

पाँचथर । पाँचथरमा उत्कृष्ट कृषक र विद्यार्थीलाई हातेमालो कृषि सहकारी संस्था लिमिटेड फिदिमले सम्मान गरेको छ। जिल्लाको अग्रणी सहकारीका रूपमा स्थापित हातेमालोले यस वर्ष विभिन्न विधाका किसान, विद्यार्थी तथा नियमित बचतकर्तालाई पुरस्कृत गर्दै सम्मान गरेको हो।

सहकारीले स्थापना गरेको ‘सुर्यकुमार निरौला उत्कृष्ट किसान पुरस्कार’ अन्तर्गत फलफुलतर्फ फालेलुङ–१ का घनश्याम सुवेदी, तरकारीतर्फ फिदिम–२ का कमलप्रसाद अधिकारी, पशुपालनतर्फ फालेलुङ–१ का पर्शुराम रिजाल, कृषिजन्य व्यवसायतर्फ फिदिम–३ का बलबहादुर राई, विशेष उत्पादनतर्फ फालेलुङ–१ का चियाकिसान सन्दिप आङबो तथा तरकारी व्यवसायी हिमबहादुर विश्वकर्मालाई पुरस्कृत गरिएको छ।

यस्तै, सहकारीले वितरण गर्दै आएको आनन्द स्मृति छात्रवृत्ति कोषबाट सिद्वकालि माविका विद्यार्थी सनम तामाङ र सिद्वेश्वरी माविकी विद्यार्थी रितु थिङलाई पनि सम्मान गरिएको छ।

नियमित बचतकर्तामा फिदिम–१ की कुमारी बुडाथोकी, उत्कृष्ट बाल बचतकर्तामा फालेलुङ–१ का दिप्जल सुवेदी चयन भए। त्यस्तै नियमित ऋणीको रूपमा फालेलुङ–१ की कृष्णमाया प्याकुरेल, फिदिम–१ की धनमाया राई र फालेलुङ–५ की प्रमिला तामाङ सम्मानित भए।

उत्कृष्ट किसान र विद्यार्थीलाई कोशी प्रदेश सरकारका पूर्व आर्थिक मामिला तथा योजना मन्त्री इन्द्रबहादुर आङबो (मौसम) ले नगद पुरस्कारसहित कदरपत्र र दोसल्लाले सम्मान गरे। कार्यक्रममा सहकारीका सदस्य, कृषि क्षेत्रमा क्रियाशील सरोकारवाला तथा हातेमालो कृषि सहकारी संस्थाका सल्लाहकारले शुभकामना व्यक्त गरेका थिए।