शैक्षिक भ्रमणबाट फर्किएको बस धनकुटामा दुर्घटना, कम्तीमा २९ जना घाइते

विराटनगर : शैक्षिक भ्रमण पुगेर तेह्रथुमबाट फर्किएको बस आइतबार दिउँसो धनकुटामा दुर्घटना हुँदा कम्तीमा २९ जना घाइते भएका छन् । घाइते हुनेहरु विद्यार्थी र शिक्षक रहेको प्रहरीले जनाएको छ । 

शैक्षिक भ्रमणमा तेह्रथुम पुगेर सुनसरीतर्फ फर्किदै गरेको को १ ख ५३१३ नम्बरको बस कोशी लोकमार्गअन्तर्गत धनकुटा नगरपालिका–७ रमाइलो घुम्तीमा आफैं अनियन्त्रित भएर दिउँसो ४ः२५ बजेतिर दुर्घटनामा परेको प्रहरीले जनाएको छ । प्रहरीका अनुसार उक्त बस सुनसरीको रामधुनी नगरपालिका–५ स्थित पिंक लोटस  इङ्लिस बोर्डिङ स्कुलको हो । 

प्रहरीले दुर्घटनामा परेर विद्यार्थी र शिक्षक गरेर कम्तीमा २९ जना घाइते भएको जनाएको छ । कतिपय आफैं अस्पताल पुगेका कारण घाइतेको संख्या बढ्न सक्ने प्रहरीको भनाइ छ । उक्त बसमा चालकसमेत गरेर अन्दाजी ४१ जना रहेको जानकारी प्रहरीले प्राप्त गरेको छ । 

सडकबाट तल खसेको बसले बाटोनजिकको एउटा घरमा पनि क्षति पुर्याएको छ । घरको कोठा भत्काउँदै बस त्यहाँबाट पनि तल खसेको प्रहरीले जनाएको छ । दुर्घटनामा परेर बसमा पनि क्षति पुगेको छ । 

दुर्घटनामा परेर घाइते भएकालाई प्रहरी र स्थानीयले उद्धार गरेर अस्पताल लगेका थिए । दुर्घटनाको कारण पत्ता लाग्न नसकेको र थप अनुसन्धान भइरहेको जिल्ला प्रहरी कार्यालय धनकुटाले जनाएको छ । 

घाइतेहरुको धनकुटा अस्पतालमा उपचार भइरहेको छ ।