मेयर बलदेवको मत ‘बदर’ बनाएपछि विवाद, झापा–२ मा मतगणना रोकियो

झापा : नेकपा एमालेको झापा क्षेत्र नं. २ मा महाधिवेशन प्रतिनिधि छनोटका लागि भएको मतदानको मतगणना विवादका कारण स्थगित गरिएको छ।

बुधवार राति बिर्तामोड–४ स्थित एमाले जिल्ला पार्टी कार्यालयमा जारी गणनाका क्रममा केही मतबारे छलकपट भएको आरोप लागेपछि प्रक्रिया रोकिएको हो।

अर्जुनधारा नगरपालिका प्रमुख बलदेव सिंह गोम्देन तामाङको नाममा आएको एक सदर मतलाई बदर गरिएको भन्दै करिब एक दर्जन स्थानीय युवाले आपत्ति जनाएका थिए।

मतलाई जानी–जानी अमान्य बनाइएको आरोप लगाउँदै उनीहरूले गणना कक्षमै विरोध जनाएपछि वातावरण तनावग्रस्त बनेको थियो।

बिर्तामोड नगरपालिका–१ देखि ९, अर्जुनधारा नगरपालिका–१ देखि ११ तथा कनकाई नगरपालिका–८ र ९ का मतगणना भइरहेका बेला विवाद उत्पन्न भएको पार्टी स्रोतले जनाएको छ।

आन्तरिक छलफलपछि बिहीबार बिहानदेखि पुनः मतगणना सुरु गर्ने समझदारी भए पनि अहिलेसम्म गणना प्रारम्भ नभएको UML झापा–२ का नेताहरूले बताएका छन्।