कांग्रेस विशेष महाधिवेशन पक्षधरको भेला : नियमित महाधिवेशन गराउन सक्रिय भूमिका खेल्ने निष्कर्ष

काठमाडौं। नेपाली कांग्रेसको विशेष महाधिवेशन पक्षधरले नियमित महाधिवेशनको कार्यतालिका कार्यान्वयन गर्न हेलचक्र्याइँ गरिए विशेष महाधिवेशन आह्वान गर्ने जनाएको छ।

पार्टीको विशेष महाधिवेशन हस्ताक्षर अभियानका तर्फबाट बिहीबार आयोजित अन्तरक्रियामा नेता गुरुराज घिमिरेले पार्टीको १५औं महाधिवेशनलाई भव्य र सफल बनाउन पार्टीका सबै तहका नेता-कार्यक र्ता एकजुट भएर जिम्मेवारीपूर्वक अघि बढ्नुपर्ने बताएका छन्।

उनले भने, “हामी सबैले एकै लक्ष्य लिएर अघि बढ्न सक्नुपर्छ। १५औं महाधिवेशन केवल औपचारिकता होइन, पार्टीको भविष्य निर्धारण गर्ने अवसर हो। त्यसैले इमानदार, निष्ठावान् र समर्पित नेताकार्यकर्ताको सक्रियता अहिले अत्यन्त जरुरी छ।”

नेता घिमिरेले सबैका सुझावलाई पार्टी नेतृत्वसमक्ष पुर्‍याइने तथा महाधिवेशन तयारीलाई थप गति दिने प्रतिबद्धता जनाएका थिए।

कांग्रेस नेता देवराज चालिसेले महाधिवेशन निर्धारित मितिमा नै हुनुपर्नेमा जोड दिँदै महाधिवेशन समयमै नहुँदा उत्पन्न हुने अनिश्चितता पार्टी हितमा नहुने र त्यसले संगठनात्मक संरचनामा विचलन ल्याउने सम्भावना रहने उल्लेख गरे।

नेता चालिसेले भने, “पार्टीभित्र देखिएका द्वन्द्वलाई संवाद र आन्तरिक लोकतान्त्रिक प्रक्रियाबाट समाधान गर्न सकिने भएकाले सोही प्रक्रियालाई बलियो बनाउने दिशामा सबै पक्ष जिम्मेवार बन्नुपर्ने भएको छ।”

नेता नारायण भट्टराईले आफूहरुले अघि सारेको विशेष महाधिवेशनको प्रस्ताव फिर्ता नलिएको तथा केवल रोकेको मात्र बताए। उनले भने, “यदि निर्धारित मितिमा महाधिवेशन गरिएन भने विशेष महाधिवेशनको प्रक्रियालाई फेरि अघि बढाउन बाध्य हुनेछौं।”

नेपाली कांग्रेस केन्द्रीय समिति बैठकले आगामी पुस २६ देखि २८ गतेसम्म नियमित १५औं महाधिवेशन गर्ने निर्णय गरिसकेको छ। महाधिवेशनमार्फत पार्टीले नयाँ नेतृत्व चयन गर्ने, विधान सुधारमा छलफल गर्ने तथा आगामी राजनीतिक दिशा-निर्देशन तय गर्ने अपेक्षा गरिएको छ।

कार्यक्रममा सहभागी विभिन्न जिल्ला, क्षेत्रीय र भ्रातृ-संगठनका प्रतिनिधिहरूले महाधिवेशन तयारीका सम्बन्धमा आफ्ना सुझाव, गुनासो र अपेक्षाहरू प्रस्तुत गरेका थिए। उनीहरूले सभासद् चयन प्रक्रिया, सदस्यता नवीकरण, आन्तरिक संगठन विस्तार तथा आर्थिक व्यवस्थापनलगायत विषयमा थप पारदर्शिता र गतिशीलता आवश्यक भएको धारणा राखेका थिए।