कांग्रेस भन्छ,'विशेष महाधिवेशनको बहस टुंगियो', अब गगन-विश्व के गर्लान

ललितपुर : नेपाली कांग्रेस केन्द्रीय कार्यसम्पादन समितिले पार्टीको १५औँ महाधिवेशन आगामी २०८३ वैशाख २८, २९, ३० र ३१ गते काठमाडौंमा गर्ने निर्णय गरेको छ । कार्यवाहक सभापति पूर्णबहादुर खड्काको सभापतित्वमा पार्टी केन्द्रीय कार्यालय बी.पी. स्मृति भवन, ललितपुरमा बसेको बैठकले यसअघिको कार्यतालिका संशोधन गर्दै नयाँ मिति तोकेको हो ।

बैठकले “विधानबमोजिम समयमै नियमित १५औँ महाधिवेशन वा विशेष महाधिवेशन” को माग अब औचित्यहीन भइसकेको स्पष्ट निष्कर्ष निकालेको छ । मिति २०८२ मंसिर १५ गते नै १५औँ महाधिवेशनको कार्यतालिका सर्वसम्मत रूपमा पारित भई प्रक्रिया अघि बढिसकेको अवस्थामा विशेष महाधिवेशनको बहस स्वतः समाप्त भएको कांग्रेसको ठहर छ ।

निर्वाचन पहिलो प्राथमिकता

केन्द्रीय कार्यसम्पादन समितिले आगामी २०८२ फागुन २१ गते हुने प्रतिनिधिसभा निर्वाचनलाई ध्यानमा राख्दै पार्टीका सबै तह— केन्द्रदेखि टोलसम्म— पूर्ण रूपमा निर्वाचनमा केन्द्रीत हुनुपर्ने निर्णय गरेको छ । पार्टीले निर्वाचन आयोगमा दल दर्ता गरिसकेको र समानुपातिकतर्फको बन्दसूचीसहित मनोनयन दर्ता भइसकेको उल्लेख गर्दै, संगठन परिचालनमार्फत कांग्रेसको पक्षमा बहुमत दिलाउन अपील गरिएको छ ।

क्रियाशील सदस्यता र अधिवेशनको विस्तृत तालिका सार्वजनिक

बैठकले महाधिवेशनको आधार मानिने क्रियाशील सदस्यता नवीकरण र नयाँ वितरणका लागि विस्तृत समयतालिका सार्वजनिक गरेको छ ।

– नयाँ क्रियाशील सदस्यताको सूची एक निर्वाचन क्षेत्र भएका जिल्लाले माघ ३, बहु–निर्वाचन क्षेत्र भएका जिल्लाले माघ १० भित्र केन्द्रमा पठाउनुपर्नेछ ।
– उजुरी छानबिन, पुनरावेदन र अन्तिम सूची फागुन १० भित्र केन्द्रीय निर्वाचन समितिलाई बुझाइनेछ ।

यसैगरी,

• वडा अधिवेशन : २०८२ चैत २१
• गाउँ/नगर अधिवेशन : चैत २५
• प्रदेशसभा क्षेत्रीय : चैत २८
• प्रतिनिधिसभा क्षेत्रीय/जिल्ला : २०८३ वैशाख २ र ५
• प्रदेश अधिवेशन : वैशाख १०–१२
• केन्द्रीय महाधिवेशन : वैशाख २८–३१, काठमाडौं

विशेष परिस्थितिलाई मध्यनजर गर्दै कांग्रेस विधान २०१७ (संशोधनसहित) को धारा ४३ प्रयोग गरी पार्टीका सबै तहका पदाधिकारी तथा सदस्यहरूको पदावधि २०८३ जेठ मसान्तसम्म थप गर्ने निर्णय पनि बैठकले गरेको छ ।

बैठकमा महामन्त्रीद्वय गगनकुमार थापा, विश्वप्रकाश शर्मा, सहमहामन्त्रीहरू तथा केन्द्रीय सदस्यहरूले आ–आफ्ना धारणा राखेका थिए ।

तर, निर्णयमा महामन्त्रीद्वय गगनकुमार थापा र विश्वप्रकाश शर्मा, सहमहामन्त्री फरमुल्लाह मन्सुर, कार्यसम्पादन समिति सदस्य अर्जुननरसिंह केसी र उमा रेग्मीले फरक मत राखेका छन् ।

बैठकपछि महामन्त्री थापाले आफूहरूले औपचारिक रूपमा फरक मत राखेको जानकारी दिएका छन् ।

‘बैठकमा कार्यवाहक सभापतिले कार्यविधि थप्दै महाधिवेशन वैशाखमा गर्ने प्रस्ताव गर्नुभयो । धारा ४३ प्रयोग गरेर प्रस्ताव ल्याइयो । हामीले फरक मत राख्यौँ तर प्रस्ताव बहुमतले पारित भयो,’ थापाले बताए ।

महामन्त्री थापाले पार्टी विधानअनुसार पुस मसान्तभित्र विशेष महाधिवेशन गरिछाड्ने अडान पनि दोहोर्‍याए ।