फोहोरको थुप्रो भासिँदा दुईको मृत्यु, दर्जनौँ बेपत्ता

मध्य फिलिपिन्सको सेबु शहरमा अवस्थित ‘बिनालिव ल्यान्डफिल’ मा ठूलो फोहोरको थुप्रो भासिँदा कम्तीमा दुई जनाको मृत्यु भएको छ भने अन्य दर्जनौँ व्यक्ति भग्नावशेषमा पुरिएका छन्।

घटनाका क्रममा करिब ५० जना सफाई कर्मचारी फोहोरभित्र फसेका थिए। उद्धारकर्मीहरूले अझै पनि जीवित व्यक्तिहरूको सङ्केत भेट्ने प्रयास गरिरहेका छन्। सेबुका मेयर नेस्टर आर्किभलले उद्धारमा थप ५०० जनशक्ति परिचालित गरिएको जानकारी दिएका छन्।

फोहोर भास्दा सबैभन्दा भाग्यशाली मध्ये एक, ४९ वर्षीय रिता कोगेले, भवन भत्किनु अघि पानी पिउन बाहिर निस्केकाले जिउँदै उद्धार भएको बताएकी छन्। उनले केही सहकर्मीलाई भग्नावशेषबाट उद्धार गरी अस्पताल पठाइएको जानकारी दिएकी छन्।

घटनास्थलमा मिथेन ग्याँस प्रज्वलित हुने जोखिम रहेको कारण उद्धारकर्ताहरूले उपकरण प्रयोग गर्नमा सावधानी अपनाएका थिए। सेबु नगरप्रमुखले आफ्नो फेसबुक पोस्टमार्फत मृत्यु हुनेको सङ्ख्या दुई पुगेको र अन्य ३६ जना अझै बेपत्ता रहेको जानकारी दिएका छन्। कम्तीमा १२ जनालाई जिउँदै उद्धार गरी अस्पताल भर्ना गरिएको छ।

सहरका सहायक जनसूचना अधिकारी जेसन मोराटाका अनुसार फोहोरको पहाड करिब चार तला अग्लो रहेको छ र प्रहरीले जारी गरेको हवाई तस्वीरमा फोहोरले थिचिएका कैयौँ संरचनाहरू देखिएका छन्।

यसअघि सन् २००० मा मनिलास्थित फोहोर पहिरोमा २०० भन्दा बढीको मृत्यु भएको थियो, जसलाई फिलिपिन्सको इतिहासकै सबैभन्दा ठूलो फोहोर त्रासदी मानिन्छ। त्यसपछि फोहोर व्यवस्थापन सुधार गर्न नयाँ कानून पारित गरिएको थियो।