पूर्वी युक्रेनमा रूसी ड्रोन आक्रमण : पाँच वर्षीय बालकसहित चार जनाको मृत्यु

किभ : पूर्वी युक्रेनमा रूसी ड्रोन आक्रमण हुँदा पाँच वर्षीय बालकसहित चार जनाको ज्यान गएको छ । स्थानीय अधिकारीहरूले शुक्रबार उक्त जानकारी दिएका हुन् ।

क्रेमलिनको आक्रमणकारी सेनाको मुख्य लक्ष्यमा रहेको डोनेट्स्क क्षेत्रमा बिहीबार भएको ड्रोन आक्रमणमा अन्य पाँच जना घाइते भएका छन् भने दुई वटा घर पूर्ण रूपमा ध्वस्त भएका छन् । स्थानीय अधिकारीका अनुसार मृतकमा ३२ वर्षीय एक पुरुष, उनका पाँच वर्षीय छोरा र उनीहरूका दुई छिमेकी रहेका छन् । अधिकारीहरूले टेलिग्राममार्फत विज्ञप्ति जारी गर्दै घटनाको पुष्टि गरेका हुन् ।

यसैबीच, डोनेट्स्ककै चेरकास्के गाउँमा भएको अर्को आक्रमणमा तीन जना किशोरी र ३४ वर्षीया एक महिला घाइते भएको जनाइएको छ । उनीहरूको स्थानीय अस्पतालमा उपचार भइरहेको छ ।

रूसले सन् २०२२ को अन्त्यतिर उक्त औद्योगिक क्षेत्र पूर्ण रूपमा आफ्नो नियन्त्रणमा लिएको दाबी गरे पनि युक्रेनी सेनासँग अझै पनि तीव्र संघर्ष जारी रहेको छ । मस्कोले युक्रेनमाथि सुरु गरेको पूर्ण आक्रमण अन्त्य गर्न कुनै पनि शान्ति सम्झौताका क्रममा डोनेट्स्क युक्रेनी सेनाले छोड्नुपर्ने अडान दोहोर्‍याउँदै आएको छ ।

क्रेमलिन समर्थित सेनाको सैन्य र राजनीतिक प्रभाव विस्तारसँगै रूसले डोनेट्स्कका केही भाग र छिमेकी लुगान्स्क क्षेत्रमाथि नियन्त्रण कायम राखेको युक्रेनी तथा अन्तर्राष्ट्रिय स्रोतहरूले जनाएका छन् ।