इटहरीमा अमेरिकी ‘विंडहाम होटल बाइ रमाडा’ सञ्चालन हुने

इटहरी । सुनसरीको इटहरीमा ‘अमेरिकी होटल ब्राण्ड विंडहाम होटल्स एण्ड रिसोर्ट्स’ले अत्याधुनिक होटल सञ्चालन गर्ने भएको छ । नेपाल उद्योग वाणिज्य महासंघका कार्यसमिति सदस्य तथा पर्यटन तथा हवाई यातायात समितिका अध्यक्ष देशबन्धु बस्नेत (अजित) ले अन्तर्राष्ट्रिय होटलको यो ब्राण्ड भित्र्याएका हुन् । इटहरीमा रहेको ग्राण्ड सेन्ट्रल होटल प्राइभेट लिमिटेडले शुक्रबार भारतको नयाँ दिल्लीमा विंडहाम होटल्स एण्ड रिसोर्ट्ससँग नेपालको इटहरीमा ‘विंडहाम होटल बाइ रमाडा’ खोल्न फ्रान्चाइजी सम्झौतामा हस्ताक्षर गरेको छ । सन् २०२४ मा होटल खोल्ने अपेक्षा गरिएको छ । यो नेपालका धेरै व्यापारिक केन्द्र र व्यावसायिक प्रतिष्ठान नजिकै अवस्थित हुने बताइएको छ । होटलमा ८० कोठा, एक दिनभर रेस्टुरेन्ट, एक बार र लाउन्ज, एक हेल्थ क्लब, स्पा र आउटडोर स्विमिङ पुल रहने छन् । यसले भोज हल र बैठक कोठा पनि प्रदान गर्ने बताइएको छ । सम्झौतामा ग्राण्ड सेन्ट्रल होटल प्रालिका अध्यक्ष बस्नेत र युरेसियाका मार्केट प्रबन्ध निर्देशक निखिल शर्माले हस्ताक्षर गरे । बस्नेतले इटहरीमा विश्वस्तरीय ब्राण्ड ल्याउन पाउनु गौरवको विषय भएको बताए । यसले नेपालको पूर्वी क्षेत्रका आगन्तुकहरूलाई विश्वस्तरीय आतिथ्य सेवा प्राप्त गर्ने अवसर सिर्जना गरेको छ । शर्माले सम्झौताले नेपालको पर्यटन विकासमा ठूलो टेवा पुग्ने बताउँदै विंडहामको रमादाले इटहरीका पाहुनालाई नेपाली परम्परागत आतिथ्यतासँगै विश्वस्तरको सेवा प्रदान गर्ने बताए । होटलमा जिम, स्पा, स्विमिङ पुललगायत पाँच तारे होटलमा आवश्यक सबै सुविधा उपलब्ध हुने बताइएको छ । विंडहाम होटल्स एण्ड रिसोर्ट्ससँग ९५ देशमा ८ हजार ९०० भन्दा धेरै होटल र २४ ब्रान्डको पोर्टफोलियो छ । रमाडा ६० भन्दा बढी देशहरूमा ८५० भन्दा बढी होटलहरू भएको विंडहाम होटल्स एण्ड रिसोर्ट्सको मिडस्केल ब्रान्डमध्ये एक हो ।