मोरङमा वडाध्यक्षका छोरा अपहरण गर्ने तीन जना पक्राउ, अपहरित बालकको सकुशल उद्धार

विराटनगर । मोरङको जहदा गाउँपालिका–१ का वडाध्यक्ष बाबुराम राजवंशीका नाबालक छोरालाई अपहरण गरेको घटनामा संलग्न तीन जनालाई प्रहरीले पक्राउ गरेको छ । प्रहरीले जहदा–१ का २० वर्षीय अभिषेक यादव, १९ वर्षीय मिथिलेशकुमार यादव र विराटनगर महानगरपालिका–१८ का २१ वर्षीय विवेकानन्द यादवलाई पक्राउ गरेको हो । जहदा–१ बुधनगरबाट पक्राउ परेका तीनै जना मिलेर १० वर्षीय धनीधर राजवंशीलाई अपहरण गरेको प्रहरीको प्रारम्भिक अनुसन्धानबाट खुलेको छ । सुरुमा अभिषेकलाई नियन्त्रणमा लिएको प्रहरी त्यसपछि अरु दुई जनालाई पक्राउ गर्न सफल भएको हो । मंगलबार दिउँसो अपहरणमा परेका नाबालक धनीधर वडाध्यक्ष बाबुरामका छोरा हुन् । प्रहरीले विराटनगर–१८ बाट उनलाई सकुशल उद्धार गरेको छ । बालक अपहरणमा परेको जानकारी पाउनसाथ अपहरणकारीको खोजी र बालकको उद्धारका लागि मोरङ प्रहरी प्रमुख एसपी दीपक पोखरेलले विशेष टोली परिचालन गरेका थिए । इलाका प्रहरी कार्यालय रानीका इन्सपेक्टर (प्रहरी निरीक्षक) सन्दीप बेलबासे र इलाका प्रहरी कार्यालय बुधनगरका सइ (प्रहरी नायव निरीक्षक) विजय बस्नेतको नेतृत्वमा खटिएको संयुक्त टोलीले बालकको उद्धार गरेको हो । मोरङ प्रहरीका प्रवक्ता डीएसपी रन्जनकुमार दाहालका अनुसार जहदा–१ बाट मंगलबार दिउँसो ३ बजेतिर बालक अपहरणमा परेका थिए । विद्यालयबाट आएर घरनजिकको मन्दिरमा साथीहरुसँग खेलिरहेका बेला अपहरण गरेर लगिएको उनले बताए ।

दाहालका अनुसार स्कुलमा तिम्रो फोटो खिचाउनुपर्ने छ भनेर ३ जना युवाहरुले ललाईफकाई साइकलमा राखेर लगेको पाइएको छ । भाथीगछ–हरिनगराको गुरुङ टोलमा पुर्याएपछि साइकलदेखि ओरालेर मोटरसाइकलमा राखी मास्क लगाएर विभिन्न स्थान हुँदै बालकलाई विराटनगर महानगरपालिका–१५ स्थित खाकीबाबा मन्दिरनजिकको यादव निवासमा लगेर राख्न खोजेको प्रहरीले जनाएको छ ।

‘यादव निवास लेखिएको घरमा राख्न खोज्दा अपहरणकारीबीच नै विवाद भएको पाइएको छ । बालकलाई त्यहाँबाट अन्यत्र लैजाने प्रयास हुँदै गर्दा थाहा पाएर स्थानीयले होहल्ला गरेछन्,’ डीएसपी दाहाल भन्छन्, ‘घटना थाहा पाउनसाथ पुगेको प्रहरीले बालकको सकुशल उद्धार गरेको छ । बालकलाई मोटरसाइकलमा बसाएपछि मिलन चोक, झोलुंगे पुल हुँदै विराटनगर–१८ र विराटनगर– १४ को बाटोबाट विराटनगर–१५ स्थित यादव निवास लेखेको घरमा पुर्याइएको रहेछ । ’ डीएसपी दाहालका अनुसार प्रहरी आएको थाहा पाएपछि अपहरणमा संलग्न भने फरार भएका थिए । बालकका बुवा एवं जहदा–१ का वडाध्यक्ष बाबुरामले छोराको अपहरणमा संलग्नलाई कारबाहीको माग राखेर इलाका प्रहरी कार्यालय रानीमा किटानी जाहेरी दिएका छन् । पक्राउ परेकाविरुद्ध अपहरण तथा शरीर बन्धक मुद्दा चलाउन बुधबार अदालतबाट म्याद थप गरेर प्रहरीले अनुसन्धानको बाँकी प्रक्रिया अघि बढाएको छ । इन्सपेक्टर सन्दीप बेलबासे नेतृत्वको टोलीले घटनाको अनुसन्धान सुरु गरेको छ । डीएसपी दाहालले विस्तृत अनुसन्धानपछि बालकलाई अपहरण गर्नुपर्ने कारण पत्ता लाग्ने बताए । बालकलाई भारत पुर्याएर बन्धक बनाउने र फिरौती लिने योजनासहित अपहरण गरिएको हुनसक्ने प्रहरीको अनुमान छ । प्रहरीका अनुसार पक्राउ परेकामध्ये मिथिलेशले भारतीय नम्बरको वाट्सएपमा कुरा गरेको पाइएको छ । अपहरणको मुख्य योजनाकार नै भारतीय नागरिक हुन सक्ने आशंका प्रहरीको छ । अपहरणको मुख्य योजनाकारका बारेमा खुल्न बाँकी रहेको र विभिन्न कोणबाट घटनाको अनुसन्धान भइरहेको डीएसपी दाहालले बताए । प्रहरी स्रोतले भने अभिभावकसँग फिरौती रकम असुल्नकै लागि बालकको अपहरण गरिएको दाबी गरेको छ । ‘तत्काल प्रहरी पुगेर उद्धार गर्न नसकेको भए बालकलाई भारत पुर्याउने रहेछन्,’ स्रोतले भन्यो, ‘घटनाको प्रकृति हेर्दा फिरौतीको ‘बार्गेनिङ’ गर्न बालकको अपहरण गरेजस्तो देखिन्छ । ’ तर, बालकको उद्धार गर्न प्रहरी सफल भएसँगै अपहरणकारीले उनलाई भारत लैजान भने पाएनन् । बेलैमा बालकको सकुशल उद्धार गर्न सफल भएको प्रहरीले अपहरणमा संलग्नलाई समेत नियन्त्रणमा लिएर अनुसन्धान एवं कारबाहीको दायरामा ल्याएको डीएसपी दाहालले बताए ।