प्रथम इलाम गोल्ड कप : टाई ब्रेकरमा पाँचथर सेमिफाइनलमा

इलाम, माघ : प्रथम एनआरएनए इलाम गोल्ड कपमा अन्तर्गत आज भएको खेलमा पाँचथर फुटबल क्लब सेमिफाइनल प्रवेश गरेको छ । इलाममा जारी प्रतियोगिता अन्तर्गत अन्तिम क्वाटर फाइनल खेलमा बुटवल फुटबल क्लब लुम्बिनीलाई टाई ब्रेकरमा ४–३ गोल अन्तरले पराजित गर्दै पाँचथरले अन्तिम चारमा आफ्नो स्थान सुरक्षित गरेको हो । निर्धारित समयमा दुवै टिमबाट २–२ गोलको बराबरी भएपछि भएको थियो । सोझै आयोजकले टाई ब्रेकरको आधारमा नतिजा लिएको थियो । टाई ब्रेकरमा पाँचथरका अशोक खवास, सुनिल खड्का, मञ्जिल खड्का र रोमन भुजेलले जाली चुमाए । सीमान्त थापाको प्रहार बुटवलका गोलकिपर मोहम्मद मोस्सीले बचाउ गरे पनि जितका लागि पर्याप्त भएन । बुटवलका चन्दन दास, विकास लामा र विदेशी खेलाडी मार्टिनले गोल गरे । जनक कोइरालाको प्रहार पाँचथरका गोलकिपर रोशन नेपालले बचाउ गरे भने अनिल महर्जनको प्रहार बाहिरिएको थियो । खेलको पाँचौँ मिनेटमा नै पाँचथरका कप्तान रोशन आङदेम्बेले हेडमार्फत पहिलो गोल गरेर अग्रता लिए पनि ३५ औँ मिनेटमा बुटवलका तर्फबाट विदेशी खेलाडी स्टेफेन न्यामले गोल गरी बराबरीमा ल्याए । ३८ औँ मिनेटमा पुनः पाँचथरका सीमान्त थापाले गोल गरी अग्रता दिलाए । पाँचथरले पाएको कर्नरको अवसरलाई सदुपयोग गर्दै थापाले जाली चुमाए । पहिलो हाफमा १ गोल अन्तरले पछि परेको बुटवलले दोस्रो हाफमा खेल सुधार गर्दै ५१ औँ मिनेटमा बराबरीमा ल्यायो । पाँचथरका खेलाडीले फल बनाएपछि पाएको फ्रिकिकको अवसरलाई सदुपयोग गर्दै बुटवलका विदेशी खेलाडी मार्टिनले गोल गरे । जितसँगै पाँचथरले अब फाइनल प्रवेशका लागि बिहीबार हुने दोस्रो सेमिफाइनलमा बिर्तामोड युनाइटेड क्लब झापासँगको भेट पक्का गरेको हो । खेलको म्यान अफ द म्याच विजेता टिम पाँचथरका कप्तान रोशन आङदेम्बे घोषित हुँदै नगद पाँच हजार प्राप्त गरे । भोलि ९बुधबार० पहिलो सेमिफाइनल खेलमा आयोजक रेडहर्ष फुटबल क्लब इलाम र न्युरोड टिम (एनआरटी) बिच फाइनल प्रवेशका लागि प्रतिस्पर्धा हुनेछ ।