शिक्षकले राजनीति गर्न र विद्यालय हाता भित्र गतिविधिमा प्रतिबन्ध

इलाम / इलामको चुलाचुली गाउँपालिकामा कार्यरत शिक्षकहरूलाई राजनैतिक गतिविधिमा पूर्ण प्रतिबन्ध गरिएको छ । गाउँ कार्यपालिकाको बैठकले शिक्षालाई राजनैतिक कार्यक्रममा जान प्रतिबन्ध गरेको हो । शिक्षकहरूले निर्णय उल्लङ्घन गरेको पाइएमा सङ्घीय शिक्षा ऐन, २०२८ को दफा १६ (ङ)को उपदफा ५ (छ) बमोजिम कारबाही गरिने बताइएको छ । शिक्षकहरू आ–आफ्ना पेसागत संघसंगठनमा आबद्ध भए तापनि कुनै राजनीतिक दलको सदस्यता लिन, त्यसका निम्ति भोट माग्न र प्रचारप्रसारमा प्रतिबन्ध लगाइएको पालिका अध्यक्ष राजेन्द्र केरुङले बताए । शिक्षक कुनै न कुनै राजनीतिक पार्टीमा आबद्ध हुने र खुला राजनीति गर्ने क्रम बढेपछि स्थानीय स्तरबाटै राजनीति गर्न पूर्ण प्रतिबन्ध लगाउने सो निर्णय गरिएको बताइएको छ । कुनै शिक्षकले निर्णयको उल्लङ्घन गरेको पाइएमा शिक्षा ऐनबमोजिम कारबाही गरिने गाउँपालिका अध्यक्षको भनाई छ । गाउँपालिकाले विद्यालय हाताभित्र राजनीतिक गतिविधि तथा कार्यक्रम आयोजना गर्न नपाइने गरी प्रतिबन्ध लगाएको छ । शैक्षिक संस्थामा राजनीतिक दल र भातृ संस्थाका कार्यक्रम गर्न नपाउने व्यवस्था गरिएको बताइएको छ । गाउँपालिका भित्र आठ वटा माध्यमिक विद्यालय, १३ आधारभूत विद्यालय, दुई सामुदायिक सिकाइ केन्द्र र १६ वटा बाल विकास केन्द्र छन् । त्यहाँ पाँच हजार बढी विद्यार्थी अध्ययनरत छन् ।