नो केबलकार आन्दोलन : धरानमा पक्राउ परेकाहरूलाई म्याद थप गरेपछि सामूहिक गिरफ्तारी दिने तयारी

धरान : ताप्लेजुङको पाथिभरा क्षेत्रमा सरकारले केबलकार निर्माणको प्रक्रिया अगाडि बढाएपछि सोमबार बन्द गर्ने क्रममा धरानमा ६ जनालाई पक्राउ गरेर म्याद थप गरेपछि पहिचान पक्षधरहरू सामूहिक गिरफ्तारी दिन इलाका प्रहरी कार्यालय धरानमा भेला भएका छन् । सोमबार पक्राउ परेका जसपाका नेता सुमन चेम्जोङसहित ६ जना युवाहरूलाई जिल्ला अदालत सुनसरीबाट सात दिनको म्याद थप गरेसँगै आन्दोलनरत समूहले सामूहिक गिरफ्तारी दिन आएको जनता समाजवादी पार्टीका नेता ताजुव लिम्बूले जानकारी दिए । नेता, कार्यकर्ताहरूलाई प्रहरीले म्याद थप गरेपछि पहिचानवादी नेताहरू तथा मुक्कुमलुङवादी पक्षधरहरू एक सय ४६ जनाले सामूहिक गिरफ्तारी दिने तयारी भएको उनले बताए । नियन्त्रणमा लिएका आन्दोलनकारीहरूलाई बिना सर्त रिहा नगरे सामूहिक गिरफ्तारी दिने उनको भनाइ छ । अहिले इलाका प्रहरी कार्यालय धरानमा उक्त समूहले डीएसपी प्रकाश जबेगुसहित प्रहरी अधिकृतहरूसँग छलफल गरिरहेको पहिचानवादी अमर इजमले बताए । सामूहिक गिरफ्तारीलाई प्रहरीले नलिए रातभर इलाकाभित्रै सम्पूर्ण आन्दोलनकारी धर्नामा बस्ने उनले बताए । खासगरी केबलकार बनाउन नहुने मागसहित आन्दोलनरत ‘नो केबलकार समूह’ले आइतबारदेखि कोशी प्रदेशका नौ वटा जिल्लामा यातायात बन्द गरेको थियो । सो क्रममा सोमबार ६ जनालाई नियन्त्रणमा लिइएको हो ।