सगरमाथाको ह्याट्रिक लक्ष्यलाई रोक्दै मच्छिन्द्र बन्यो इटहरी गोल्डकपको च्याम्पियन

इटहरी ।  १५ औँ संस्करणको अन्तर्राष्ट्रिय आमन्त्रण इटहरी गोल्ड कप फुटबल प्रतियोगिताको उपाधि मच्छिन्द्र फुटबल क्लब काठमाडौँले उचालेको छ । शनिवार भएको फाइनल खेलमा सगरमाथा युथ क्लब मोरङलाई २-० गोल अन्तरले पराजित गर्दै पहिलो पटक उपाधि उचालेको हो । जीत सँगै मच्छिन्द्रले नगद १० लाख सहित ट्रफी र प्रमाणपत्र प्राप्त गरेको छ । उपविजेता बनेको सगरमाथाले नगद ५ लाखमा चित्त बुझायो । सगरमाथाले यसअघि लगातार दुई पटक प्रतियोगिताको उपाधि उचालेको थियो । सगरमाथाको ह्याट्रिक जीत निकाल्ने लक्षलाई रोक्दै मच्छिन्द्र भने पहिलो पटक विजेता बनेको हो । सगरमाथाका अशोक खवास भने फाइनल खेलको म्यान अफ दि म्याच घोषित भएका छन् । गत फागुन ३ गतेबाट सुरु भएको प्रतियोगितामा विधागत उत्कृष्टतामा पनि खेलाडीहरू पुरस्कृत भएका छन् । प्रतियोगिताको सर्वोत्कृष्ट खेलाडी सगरमाथा युथका कुलदीप कार्की भए । उनले एक लाख, उत्कृष्ट गोलरक्षक बनेका मच्छिन्द्रका विशाल श्रेष्ठ, उत्कृष्ट डिफेन्डर मच्छिन्द्रकै सनिस श्रेष्ठ, उत्कृष्ट मिड फिल्डर मच्छिन्द्रकै विशाल तामाङ उत्कृष्ट फरवार्ड मलिक युसुफ, उत्कृष्ट प्रशिक्षक मच्छिन्द्रकै सन्तोष न्यौपानेले जनही २०- २० हजार प्राप्त गरेका छन् । यसै गरी प्रतियोगिताभर चार गोल गरी सर्वाधिक गोलकर्ता बनेका मच्छिन्द्रका मलिक युसुफले नगद २५ हजार प्राप्त गर्दा राइजिङ प्लेयर सनिप घिमिरेले एक थान एलइडी टिभी प्राप्त गरेका छन् । प्रतियोगितामा आयोजक राष्ट्रिय जागृति क्लब सहित कुल ८ टिमको सहभागिता रहेको थियो ।