धरान : धरानका चार वटा त्रिभुवन विश्वविद्यालय आङ्गिक क्याम्पसमा सम्पन्न स्वतन्त्र विद्यार्थी युनियन (स्ववियु) निर्वाचनमा नेविसंघले दुई क्याम्पसमा जित हासिल गरेको छ भने एक क्याम्पसमा स्वतन्त्र प्यानल विजयी भएको छ। पिण्डेश्वर विद्यापीठमा भने कार्यसमिति निर्विरोध चयन भएको छ।
महेन्द्र बहुमुखी क्याम्पसमा गठबन्धन विजयी
धरानको महेन्द्र बहुमुखी क्याम्पसमा नेविसंघ र अनेरास्ववियुको गठबन्धनले जित हात पारेको छ।
सभापतिमा नेविसंघका प्रशान राई १२९१ मतसहित विजयी भए भने उनका प्रतिद्वन्द्वी समाजवादी विद्यार्थी युनियनका युवराज राईले ६०० मत प्राप्त गरे।
सचिवमा अनेरास्ववियुका पवन बस्नेतले ११९३ मत ल्याएर जितेका छन् भने कोषाध्यक्षमा नेविसंघका आलोक लिम्बू १३०४ मतसहित निर्वाचित भएका छन्।
इन्जिनियरिङ क्याम्पसमा पनि नेविसंघको नेतृत्व
पूर्वाञ्चल इन्जिनियरिङ क्याम्पसमा नेविसंघका सागर बस्याल ६६८ मत ल्याएर सभापतिमा विजयी भए। उनका प्रतिद्वन्द्वी समाजवादी विद्यार्थी युनियनका गणपति झाले ४४६ मत प्राप्त गरे।
सचिवमा अनेरास्ववियुका प्रमिशा न्यौपाने ५८० मत ल्याएर निर्वाचित भए भने कोषाध्यक्षमा नेविसंघका यामनाथ गुरागाईँ ६७४ मतसहित विजयी भए।
केन्द्रीय प्रविधि क्याम्पसमा स्वतन्त्र प्यानलको जित
केन्द्रीय प्रविधि क्याम्पसमा क्रान्तिकारी समर्थित स्वतन्त्र प्यानलका उम्मेदवारले नेतृत्व हात पारेका छन्। सभापतिमा स्वतन्त्र प्यानलका पेशलराज कार्की ४१३ मतसहित विजयी भए भने गठबन्धनका अनिरुद्ध श्रेष्ठले ३६४ मत पाए।
सचिवमा विश्वेवर प्रसाद बढु ४२७ मतसहित विजयी भए भने कोषाध्यक्षमा क्रान्तिकारीका नामसाङ्ग राई ४०८ मत ल्याएर निर्वाचित भए।
पिण्डेश्वर विद्यापीठमा निर्विरोध नेतृत्व चयन
धरानको पिण्डेश्वर विद्यापीठमा भने प्रतिस्पर्धा नै हुन सकेन। उम्मेदवारी मनोनयन प्रक्रियामा सभापतिलगायत सबै पदमा एक/एक जनाको मात्र उम्मेदवारी परेपछि सम्पूर्ण कार्यसमिति निर्विरोध निर्वाचित भएको छ।
सभापतिमा अनेरास्ववियुका सुधाकर पोखरेल निर्विरोध चयन भए।
धरानका क्याम्पसहरूमा सम्पन्न यस निर्वाचनमा नेविसंघ र अनेरास्ववियुको गठबन्धनले दुई क्याम्पसमा जित हासिल गर्दै वर्चस्व जमाएको छ भने एक क्याम्पसमा स्वतन्त्र प्यानलको जितले विद्यार्थी राजनीतिमा विविधता देखिएको छ।
पिण्डेश्वरमा भने कुनै प्रतिस्पर्धा नै नभएकाले निर्विरोध नेतृत्व चयन भएको हो।
प्रदेश खबर
प्रतिक्रिया