इलाममा ज्वाइँले गरे जेठी सासूको हत्या

 इलाम : इलामको माई नगरपालिका वडा ४ सिंजालीटारमा ज्वाइँले जेठी सासूको हत्या गरेका छन् ।

धारिलो हतियार प्रहार गरी ५२ वर्षीया भूमिका चापागाईँको ज्वाइँले हत्या गरेका हुन् । शुक्रवार साँझ ७ बजे छिमेकीकोमा दूध लिन जाँदै गरेकी चापागाईँलाई माई ४ शुक्रबारे घर भई सिंजाली कार्कीटार  बस्दै आएका बहिनीका श्रीमान् शान्तिराम दुलालले धारिलो हतियार खुकुरी प्रहार गरेका थिए । 

कन्चट र गर्धनमा गहिरो चोट लागेकी चापागाईँलाई उपचारका लागि माई अस्पताल हुँदै वि एण्ड सी अस्पताल बिर्तामोड पुर्‍याएको भए पनि गए राती मृत्यु भएको बताइएको छ । 

दुलाल सँग उनी श्रीमती गीता चापागाईँको माना चामल र अंश मुद्दा अदालतमा चलिरहेका अवस्थामा गत महिना जिल्ला अदालत परिसरमा जेठी सासू मृतक भूमिका माथि विवाद भएको जनाइएको छ ।  

जेठी सासूले अभद्र व्यवहार भएको भन्दै दुलाल विरुद्ध‌ मुद्दा दायर गरेकी थिइन्। प्रहरीले दुलाललाई फरार सूचिमा राखेर खोजी गरिरहेको थियो । दुलालले प्रतिसोधका आधारमा भूमिकाको हत्या गरेको हुन सक्ने बत्ताइएको छ। हत्या आरोपित दुलाललाई नियन्त्रणमा लिएको छ ।

मृतक चापागाईँको शव वि एण्ड सी अस्पताल बिर्तामोडमा रहेको छ ।