पार्टीमा विरोधका कुरा उठ्नु स्वाभाविक हो : देउवा

इटहरी । नेपाली कांग्रेसका सभापति शेरबहादुर देउवाले मुलुकमा स्थायित्व र दीगो शान्ति आवश्यक रहेको बताएका छन् । ४१औँ बीपी स्मृति दिवस अवसरमा सुनसरीको इनरुवामा आयोजित सम्मेलान उद्घाटन कार्यक्रमलाई सम्बोधन गर्दै उनले शनिबार यस्तो बताएका हुन् । ‘लोकतन्त्रको रक्षा गर्ने पहिलो दायित्व कांग्रेसलाई छ । बीपीले परिकल्पना गर्नुभएको लोकतन्त्रतको स्थायित्वका लागि दीगो शान्ति आवश्यक छ । त्यसका निम्ति सबैलाई एकजुट हुन आग्रह गर्दछु’ देउवाले भने । पार्टी केन्द्रीय समितिको बैठक लाइभ गरेका कारण सकारात्मक प्रतिक्रिया आएकाले आफूलाई खुसी लागेको उनले बताए । ‘पार्टीमा विरोधका कुरा पनि उठिरहेका छन्, यो स्वाभाविक हो,’ पूर्वप्रधानमन्त्री समेत रहेका देउवाले भने, ‘मैले पार्टी बैठकलाई लाइभ प्रशारण गरिदिएँ, यसकारण अहिले पार्टीभित्र सकारात्मक कुरा आएको छ, म खुसी छु ।’ खासगरी वीपी र गिरिजाप्रसादको कर्मथलो सुनसरीमा आउन पाएकोमा खुसी व्यक्त गर्दै उनले आगामी दिनमा पनि आइरहने प्रतिबद्धता व्यक्त गरे । अहिले नेपाली राजनीतिमा लोकतन्त्रको रक्षाका निम्ति गठबन्धन आवश्यक रहेको देउवाले बताए । ‘लोकतन्त्रको रक्षाका निम्ति गठबन्धन आवश्यक थियो, यसैकारण अहिले कांग्रेस पहिलो पार्टी बनेको छ,’ उनले भने, ‘आगामी दिनमा कांग्रेसलाई बहुमत दिलाउनका निम्ति सबै साथीहरूलाई एकजुट हुन आग्रह गर्दछु ।’ कार्यक्रममा पार्टीका सह–महामन्त्री भीष्मराज आङ्देम्बे, पार्टीका पूर्व उपसभापति विजयकुमार गच्छदार, कांग्रेस केन्द्रीय सदस्य ज्ञानेन्द्रबहादुर कार्की, केन्द्रीय सदस्य तथा प्रचार विभाग प्रमुख मीन विश्वकर्मा, केन्द्रीय सदस्यहरू अमृत अर्याल, राजीव ढुंगाना, राजीव कोइराला, लक्ष्मी खतिवडा, उमेशजंग रायमाझी, कल्पना चौधरी, कोशी प्रदेशका मुख्यमन्त्री तथा पार्टी प्रदेश सभापति उद्धव थापा लगायतले बोलेका थिए ।