झापामा कालाजार रोगको संक्रमण देखियो

झापा, लामखुट्टे तथा भुसुनाको टोकाइबाट लाग्ने कालाजार रोग उन्मूलनका लागि सरकारले बिभिन्न कार्यक्रम सञ्चालन गरेपनि झापामा कालाजार रोगको संक्रमण देखिएको छ । जनस्वास्थ्य तथा सरुवा रोग अनुसन्धान केन्द्र र रोग नियन्त्रण महाशाखा काठमाडौँले कालाजार रोग सार्ने भुसुनाका बारेमा अध्ययन अनुसन्धान गरी त्यसलाई नियन्त्रण गर्ने अभियान चलाई रहेका बेला बिर्तामोड ५ मा कालाजारको संक्रमण देखिएको हो ।अभियान सञ्चालन भइरहँदा ५२ बर्षीय पुरुषमा संक्रमण देखिएसंगै स्वास्थ्य कार्यालय झापाले जनप्रतिनिधि, स्वास्थ्यकर्मी, महिला स्वास्थ्य स्वयम्सेविका, सरोकारवालालगायतलाई अभिमुखीकरण तथा सक्रिय खोजपड्ताल परीक्षण कार्यक्रम अघि बढाएको छ । रोग फैलन नदिन कार्यालयले बिर्तामोड ५ मा वडा अध्यक्ष रोहित प्रसाईको अध्यक्षतामा कार्यक्रम सञ्चालन गरेको स्वास्थ्य कार्यालय झापाका कालाजार रोग फोकल पर्सन बिरेन्द्र दासले जानकारी दिए । स्वास्थ्य कार्यालयले संक्रमित व्यक्ति रहेको टोल जात्रुबारीमा नजिकका १७ जनाको आरडिटी किटमार्फत रगत परीक्षणसमेत गरेको छ । परीक्षण गरिएका सबैमा संक्रमण नदेखिएको बिर्तामोड नगरपालिका स्वास्थ्य शाखाका सिनियर अहेब दिपक सापकोटाले जानकारी दिए । परीक्षणमा विश्व स्वास्थ्य संगठनका प्रतिनिधिको समेत उपस्थिति रहेको स्वास्थ्य कार्यालयका प्रयोगशाला सहायक चन्द्रशेखर कुमार यादवले जानकारी दिए । प्रोटोजोआको लिस्मेनिया परजीवी ‘स्यान्ड फ्लाई’ नामको पोथी भुसुनाको टोकाईबाट मानिसमा कालाजार संक्रमण हुने गर्दछ ।