इटहरीमा बस र स्कुटर ठोक्किएर दुर्घटना हुँदा दुई जनाको मृत्यु

इटहरी  : सुनसरीको इटहरी–२० इटहरी  धरान सडक खण्ड स्थित  पानीपिया जङ्गलमा आज शनिवार बिहान ११:२० बजे स्कुटर र बस एक आपसमा ठोक्किँदा दुई जनाको मृत्यु भएको छ।

इटहरीबाट धरानतर्फ जादैँ गरेको प्रदेश  १–०२–००२ ख ०४५५ नम्बरको बस र विपरीत दिशाबाट आइरहेको को २२ प २१२५ नम्बरको स्कुटर ठोक्किँदा स्कुटर चालक झापा बिर्तामोड–५ का सुजन बिक र पछाडि सवार सुरज बिक गम्भीर घाइते भएका थिए।

घाइते दुवै जनाको धरान स्थित बीपी कोइराला स्वास्थ्य विज्ञान प्रतिष्ठान, धरानमा उपचारको क्रममा दिउसो १२ : ३० बजे मृत्यु भएको जिल्ला प्रहरी कार्यालय सुनसरीका प्रहरी प्रवक्ता योगराज खतिवडाले जानकारी दिए।

बस चालक उदयपुर बेलका नगरपालिका–३ का प्रेम मगरलाई जिल्ला प्रहरी कार्यालय सुनसरीले  नियन्त्रणमा लिएको छ भने, घटना सम्बन्धमा थप अनुसन्धान भइरहेको जिल्ला प्रहरी कार्यालय सुनसरीले जनाएको छ ।