विपद् बेला यौन तथा प्रजनन स्वास्थ्य : धरानमा सरोकारवालाबिच अन्तरक्रिया

धरान : विश्व मानवतावादी दिवस २०२५ को अवसरमा नेपाल परिवार नियोजन सङ्घ, सुनसरी शाखाले शुक्रवार धरानमा “विपद् र आपतकालीन अवस्थामा यौन तथा प्रजनन स्वास्थ्य सेवाको महत्त्व” विषयक अन्तरक्रिया कार्यक्रम सम्पन्न गरेको छ।

कार्यक्रममा सङ्घकी सभापति निर्मला अधिकारीको अध्यक्षता तथा इलाका प्रशासन कार्यालय धरानका प्रमुख लक्ष्मीप्रसाद रेग्मीको प्रमुख आतिथ्यतामा छलफल भएको हो।

कार्यक्रममा धरान उपमहानगरपालिका, स्वास्थ्य कार्यालय सुनसरी, रेडक्रस, विभिन्न सङ्घसंस्था, जनप्रतिनिधि, पत्रकारलगायत सरोकारवालाको सहभागिता रहेको थियो।

अन्तरक्रियामा प्रस्तुतकर्ताहरूले विपद् वा जोखिमका समयमा महिला, किशोरी, यौनिक अल्पसङ्ख्यक, फरक क्षमता भएका व्यक्ति तथा एचआइभी सङ्क्रमित समुदाय विशेष रूपमा जोखिममा पर्ने तथ्य प्रस्तुत गरे।

आपतकालीन अवस्थामा अनिच्छित गर्भधारण, असुरक्षित गर्भपतन, बालविवाह, जबरजस्ती विवाह, यौन हिंसा र एचआइभी सङ्क्रमणजस्ता समस्या चर्किने भएकाले पूर्वतयारी र प्रभावकारी सेवा सुनिश्चित गर्नुपर्नेमा जोड दिइयो।

नेपाल परिवार नियोजन सङ्घ सुनसरी शाखा प्रबन्धक रानु राउतले न्यूनतम प्रारम्भिक सेवा प्याकेज (MISP) को अवधारणाबारे जानकारी गराइन्।

यसैगरी धरान उपमहानगरपालिका विपद् व्यवस्थापन शाखाका प्रमुख भेषराज घिमिरे र स्वास्थ्य कार्यालय सुनसरीका पब्लिक हेल्थ नर्स उर्मिला राईले विपद्मा यौन तथा प्रजनन स्वास्थ्यलाई प्राथमिकतामा राख्नुपर्ने आवश्यकता औँल्याए।

मुख्य अतिथि रेग्मीले आपतकालीन अवस्थामा स्थानीय सरकार,प्रदेश सरकार र समुदायलाई सचेत र सशक्त पार्दै मानवीय कार्यमा साझेदारी र सहकार्य आवश्यक हुने बताए।

कार्यक्रमको स्वागत मन्तव्य कोषाध्यक्ष सागर प्रसाईँले गरेका थिए भने समापन सभापति निर्मला अधिकारीले गर्दै सरकारी, गैरसरकारी तथा सामुदायिक निकायबिच सहकार्यलाई अझ मजबुत बनाउन आग्रह गरिन्।