३५ वर्षीय सुधन गुरुङ : जेन–जीको नेतृत्वमा उदाएको अपरिचित अनुहार,कसरी बने विद्रोहका नेतृत्वकर्ता ?

गोरखा : जेन–जीको प्रदर्शनको तयारीबारे एकाधबाहेक प्रायः अनभिज्ञ थिए । त्यसतर्फ अगाध आस्था राख्नेबाहेक अरूले छिपछिपे जानकारी मात्र पाएका थिए ।

राज्यको ‘बलियो’ अनुसन्धान विभागले पनि फितलो अनुसन्धान गरेकाले सरकारले पनि भदौ २३ को विरोध प्रदर्शनलाई नजरअन्दाज गर्‍यो । तर, नतिजा नसोचेको भयो । 

भदौ २३ मा जेन–जीको प्रदर्शनमा राज्य पक्षबाट चरम दमन भयो । धेरै जनधनको क्षति भयो । त्यसको बदला स्वरूप जेन–जीले २४ गते प्रतिशोध विद्रोह गरे । राजनीतिक उथलपुथल हुने गरी भएको विद्रोहपछि क्रमशः यसका नेतृत्वकर्ताहरूको खुलासा हुन थाल्यो ।

सरकार गठनका लागि जंगीअड्डा, शीतल निवासमा भएको वार्ता संवादमा होओस् वा यसबिचमा रणनीति बनाउने सिलसिलामा होओस् ।

अर्थात्, प्रधानमन्त्री चयनपछिको खुसीयाली साँटासाँट गर्ने क्रममा एउटा अपरिचित अनुहार एकाएक दृश्यमा प्रकट भयो । उनी हुन्– सुधन गुरुङ । जेन–जीको आन्दोलनलाई नेतृत्व गरेका उनी भने जेन–जी भने थिएनन् ।

‘जेन–जी’ भनेर २८ वर्ष उमेर समूहकालाई चिनिन्छ तर उनी हुन, ३५ वर्षका । सामाजिक सञ्जालमा सार्वजनिक भएको उनको नागरिकतामा उनको जन्ममिति २०४७ साल लेखिएको छ ।

नागरिकताको प्रतिलिपिमा जन्मस्थान गोरखाको चुमनुब्री गाउँपालिका ३ सिर्दिबास रहेको लेखिएको छ । स्थानीयवासी, इष्टमित्र, आफन्तजनका अनुसार उनको जन्म काठमाडौँमा भएको हो । 

जेन–जीले औपचारिक रूपमा कसैलाई पनि अभियानको संयोजक तोकेका छैनन् । तर, सामाजिक सञ्जाल, टेलिभिजनहरूमा उनको क्रियाकलाप अगाडि देखिने गरेको छ ।

उनको आवाज निर्णायक बन्ने गरेको छ । सुशीला कार्की प्रधानमन्त्री बनेपछि उनको पाउमा साष्टाङ्ग दण्डवत् गरेको तस्बिर तथा भिडियोले त सबैको ध्यान खिच्यो नै ।  

उनको पुर्ख्यौली थलो साबिक सिर्दिबास गाविस नाग्चेत हो । उनका बुबा दिलबहादुर गुरुङलाई गाउँघरमा इष्टमित्र, आफन्तजनले ग्याल्बो भनेर सम्बोधन गर्छन् ।

उनका तीन श्रीमतीमध्ये माहिली श्रीमतीबाट सुधनको जन्म भएको हो । चितवनको मेघौलीमा उनको प्रारम्भिक स्कुले जीवन बित्यो ।

उनी १०–१२ वर्षको हुँदा बाबा र आमाको सम्बन्ध बिच्छेद भयो । त्यसपछि उनी मामाघरका हजुरबा, हजुर आमाको संरक्षणमा काठमाडौँमा हुर्किए, बढे, पढे । काठमाडौँमा जन्मे, चितवनमा बाल्यकाल बिताए पनि उनको जन्मस्थल गोरखा भनेरै चिनिन्छ । 

चुमनुब्री ३ को बुद्ध मावि मतदान केन्द्रमा उनको मतदाता नामावली छ । तर अहिलेसम्म मतदान गर्न उनी गाउँ नआएको स्थानीयवासीको भनाइ छ ।

‘उनी हाम्रो आफन्त हुन, तर सानैदेखि देखेको मान्छेचाहिँ होइनन्’,चुमनुब्री गाउँपालिकाकी निवर्तमान उपाध्यक्ष कुमारी गुरुङ भन्छिन्, ‘नागरिकता, मतदाता परिचयपत्रचाहिँ यहीँको छ ।’

उनका दाइ नाता पर्ने सुमन गुरुङ चितवनमा बाल्यकाल सँगै बिताएको तर, धेरै वर्षदेखि भेटघाट नभएको बताउँछन् । ए लेभल पढेपछि उनी साथीभाइको सङ्गतमा नै रमाए ।

सङ्गीतमै क्लब, डिस्को जाने बानी बसालिसकेका थिए । उनले डिजेको काम सुरु गरे । डिजेमा स्थापित भएका उनले ठमेलमा ओएमजी क्लब सञ्चालन गरे । क्लबबाट उनको आर्थिक स्थिति राम्रै बन्यो । 

व्यवसायी करिअरका क्रममा ०७२ सालको भूकम्पपछि सुधन सामाजिक सेवातिर मोडिए ।

विशेषगरी राहत र उद्धारमा उनको खटाइले चर्चा पायो । त्यसपछि उनले ‘हामी नेपाल’ नामक सामाजिक संस्था स्थापना गरे । जसमा १ हजार ६ सयभन्दा बढी सदस्य जोडिएका छन् । सेवाभावले खुलेको यसमा देशी–विदेशी कम्पनीहरूबाट अनुदान प्राप्त हुने गरेको छ । 

रात्रिकालीन व्यवसायबाट समाजसेवामा मोडिएका सुधनले भूकम्पका पीडितहरूलाई सहयोग गरेर प्रशंसासँगै राम्रो ख्याति कमाए । यसपछि रात्रिकालीन व्यवसायमा फर्किएनन् ।

बरु रियलस्टेट, एड्भेन्चर, वाटरस्पोट्र्स बिजनेसतर्फ लागे । बिजनेसको के कुरा, भूकम्पका बेला, कोभिडका बेला स्वयंसेवा गरेर एउटा तहमा चिनिएका उनले सबैभन्दा धेरै चर्चा अहिले कमाएका छन् ।

देशभरका र विशेष गरी गोरखाली युवाहरूले उनको तस्बिर र भिडियो सामाजिक सञ्जालमा साझा गर्दै उनको मनग्य तारिफ गरेका छन् ।

आजको अन्नपुर्णं पोस्ट दैनिकमा प्रकाशित छ ।