लोकतन्त्रमा मात्रै श्रमिक अधिकार सुरक्षित हुन्छ : मजदुर नेता भीमज्वाला राई

धरान । लोकतन्त्रमा मात्रै श्रमिकहरुको अधिकार सुरक्षित हुने मजदुर नेता भीमज्वाला राईले बताउनुभएको छ । नेपाली श्रम आन्दोलनको सात दशक लामो संघर्ष र रगत पसिनाबाट निर्माण गरिएको संविधान र संघीय लोकतान्त्रिक गणतन्त्रात्मक व्यवस्थाविरुद्ध षड्यन्त्र भइरहेको भन्दै श्रमिकहरुले खबरदारी गर्नुपर्ने आवश्यकता औंल्याउँदै राईले यस्तो बताएका हुन्।

सुरक्षा श्रमिक ट्रेड युनियन नेपालले बीपी कोइराला स्वास्थ्य विज्ञान प्रतिष्ठानमा शनिबार आयोजना गरेको कार्यक्रममा नेपाल यातायात स्वतन्त्र मजदुर संगठनका केन्द्रीय अध्यक्ष तथा जिफन्ट राष्ट्रिय कमिटीका सदस्य समेत रहेका राईले व्यवस्था खारेजीका लागि देशी तथा विदेशी शक्तिहरुले षड्यन्त्र गरिरहेकाले श्रमिकहरुको एकतावद्ध संघर्ष अपरिहार्य भएको धारणा राखे।

उनले भने, “२ सय ५० वर्षमा देशलाई कंगाल बनाएका वंश परम्परागत शासन व्यवस्थाको कालो इतिहास नालीबेली नबुझेर प्रविधिमा युरोप अमेरिका हेरेर लोकतन्त्रको प्राप्तीको २० वर्षमा नेपाललाई किन विकास भएन भन्ने नयाँ पुस्ताको कमजोर बुझाइलाई भड्काएर भएको नरसंहारका कारण देश राजनीतिक, आर्थिक र सामाजिक रुपमा कमजोर बन्दै गएको छ।”

राईले देशी तथा विदेशीको इशारामा संविधान र व्यवस्था खारेजी गर्ने षड्यन्त्रमा नेपालका जेनजी पुस्ता परेको भन्दै संविधान र व्यवस्थाको रक्षाका लागि श्रमिकहरुले फेरि एकपटक संघर्ष गर्नुपर्ने बेला आएको बताए। उनका अनुसार, “हामी श्रम ऐन, सामाजिक सुरक्षा ऐन कार्यान्वयन र श्रमिकहरुको जीवन रुपान्तरणका लागि लडिरहेकै छौं, अब संविधान र व्यवस्था रक्षाका लागि पनि लड्नुपर्ने अवस्था आएको छ।”

कार्यक्रममा जिफन्ट धरान नगर अध्यक्ष समशेर बर्देवा, उपाध्यक्ष कमल भट्टराई, कान्तिपुर सेक्युरिटी कम्पनी धरान ब्रान्च प्रमुख दुर्गा खतिवडाले शुभकामना व्यक्त गरेका थिए। साथै, नेपाल पत्रकार महासंघ सुनसरी अध्यक्ष सन्तोष काफ्ले, प्रेस चौतारी नेपाल सुनसरी अध्यक्ष विकास चाम्लिङलगायतको सहभागिता रहेको थियो।

सुरक्षा श्रमिक इकाई कमिटीका अध्यक्ष रत्न नेम्वाङको अध्यक्षता र सचिव प्रविण राईको सञ्चालनमा सम्पन्न कार्यक्रममा बीपी प्रतिष्ठानमा कार्यरत १ सय ३६ जना सुरक्षा श्रमिकहरुको सहभागीता रहेको थियो।