पाकिस्तानको अर्धसैनिक बलको मुख्यालयमा आत्मघाती आक्रमण, तीन प्रहरीको मृत्यु

काठमाडौँ । पाकिस्तानको पेशावरमा रहेको संघीय कन्स्टेबुलरी मुख्यालयमा सोमबार आक्रमण भएको छ । अन्तराष्ट्रिय मिडिया रिपोर्टका अनुसार, मुख्यालय नजिकै धेरै विस्फोटहरू सुनिएका थिए, जसले गर्दा क्षेत्र खाली गरिएको थियो ।

पाकिस्तानी सुरक्षा एजेन्सीहरूले आक्रमणमा संलग्न आत्मघाती हमलाकारीहरू मारिएको बताएका छन् । सो आक्रमणमा परी तीन प्रहरी कर्मचारी मारिएका छन् र दुई जना घाइते भएका छन्।

पाकिस्तानको द डनका अनुसार, आक्रमण बिहान ८ बजे सदर-कोहट सडकमा भएको थियो । एक आत्मघाती हमलाकारीले मुख्यालयको गेटमा आफैलाई विस्फोट गराएको थियो । त्यसपछि गोली चलेको सुनियो । अर्को आक्रमणकारीले मुख्यालयमा प्रवेश गर्ने प्रयास गरेको थियो । यद्यपि, सुरक्षा बलहरूले उनलाई गोली हानी मारेका थिए । त्यसपछि सुरक्षा बलहरूले क्षेत्रलाई घेरा हालेर उद्धार कार्य सुरु गरेका थिए ।

आक्रमण गरिएको संघीय प्रहरी बल एक नागरिक अर्धसैनिक बल हो, जसलाई पहिले फ्रन्टियर कन्स्टेबुलरी भनेर चिनिन्छ ।