पार्टीलाई एकताबद्ध राख्ने कि नराख्ने भन्ने कुरा अब उहाँहरूकै हातमा छ : प्रवक्ता महत

काठमाडौँ । नेपाली कांग्रेसका प्रवक्ता डा. प्रकाशशरण महतले महामन्त्रीद्वय गगन थापा र विश्वप्रकाश शर्मा समूहले एकलौटी रूपमा विशेष महाधिवेशनको कार्यविधि पारित गरेको भन्दै आपत्ति जनाएका छन् । संस्थापन पक्षको बहिष्कारका बिच पारित गरिएको उक्त कार्यविधि विधानविपरीत भएको भन्दै उनले पार्टी एकता जोगाउने जिम्मा अब असन्तुष्ट पक्षकै हातमा रहेको बताए ।

प्रवक्ता महतले गगन–विश्वप्रकाश समूहको पछिल्लो कदम पार्टीको विधान र प्रक्रियाविपरीत भएको टिप्पणी गरे । उनले अहिले अघि बढाइएको भनिएको कार्यविधि र प्रक्रियामा विधि र विधान केही पनि नमिलेको जिकिर गरे । संस्थापन पक्षसँगको अनौपचारिक वार्तालाई लत्त्याएर अर्को पक्षले एकलौटी निर्णय गरेको उनको आरोप छ ।

‘हामीहरू अनौपचारिक रूपमा वार्ता गरिरहेका थियौँ, तर उहाँहरूले त्यसलाई उल्लङ्घन गर्नुभयो,’ महतले भने, ‘पार्टीलाई एकताबद्ध राख्ने कि नराख्ने भन्ने कुरा अब उहाँहरूकै हातमा छ ।’