निर्माणकार्य अलपत्र पारेपछि स्थानीयद्धारा सडक अवरुद्व

इटहरीमा निर्माणकार्य अलपत्र पारेपछि स्थानीयबासीले सडक अवरुद्व गरेका छन् । इटहरी ८ सतनमार्गमा २०७८ कात्तिक २७ गतेदेखि निर्माण सुरु भएपनि हालसम्म पूरा नभएपछि स्थानीयबासीले आक्रोश पोख्दै आइतबार (आज) सडक अवरुद्व पारेका हुन् । इटहरी ८ स्थित बिजुली अफिस नजिकैबाट स्कुल मोडसम्मको करीब १ किलोमिटर सडक निर्माण सुरु भएको १३ महिना बितेपनि सम्पन्न नभएपछि आँफूहरू आजित भएको सडक निर्माण अनुगमन समिति संयोजक भीम बस्नेत (जंगली) ले बताए । सडक निर्माणको काम सुरु भएको १३ महिना बितिसक्दा पनि कालोपत्रे गर्न सम्बद्व निकायले ध्यान नदिएकाले स्थानीय उपभोक्ताले न्यायका निम्ति बाटो अवरोध गरेको उनको भनाइ छ । ‘सहायक बाटोमध्ये सबैभन्दा व्यस्त बाटो हो यो, दैनिक ४०/५० वटा स्कुल बस यहीँबाट हिड्छन्, विभिन्न सरकारी कार्यालय यही बाटोमा पर्छ,’ बस्नेतले भने, ‘तर हालसम्म कसैले चासो नदेखाउँदा ठेक्का लिने कम्पनीले निर्माण नै गरेन, हामीले बाध्य भएर सडक अवरुद्व गरेका हौँ ।’ उनका अनुसार पटकपटक वडा कार्यालयमार्फत इटहरी उपमहानगरपालिकामा जानकारी गराइएपनि बजेट अभाव भएको भन्दै सडक निर्माण नभएको उनले बताए । उनका अनुसार उक्त ठाउँं इटहरी ८ को कार्यालय, यातायात व्यवस्था विभागको कार्यालय, कम्पनी रजिष्ट्रारको कार्यालय जाने बाटो हो । तर, कुनै पनि निकायले चासो नदेखाएका कारण आँफूहरूले दबाब दिनका लागि बाटोमा बाँस र स्याउला लगाएर अवरुद्व गर्न बाध्य भएको बस्नेतले बताए । ‘कतिको ठेक्का हो, कति समयसम्म निर्माण हुनुपर्ने हो,’ केही थाहा छैन, उनले भने, ‘हामीले पटकपटक जानकारी माग्दा पनि बेवास्ता गरेपछि बाटो नै अवरुद्व गर्न बाध्य भएका हौँ ।’ स्थानीयले सडक अवरुद्व गरेपछि यो ठाउँबाट दैनिक आवतजावत गर्ने दर्जनौँ सवारी साधनका यात्रुले सास्ती खेपेका छन् । यता, निर्माणको जिम्मा लिएको गिरी कन्ट्रक्सनका ठेकेदार कुमार गिरीसँग भने पटकपटक सम्पर्क गर्न खोजिएपनि उनको फोन उठेन । इटहरी ८ का वडाध्यक्ष रोहित चौधरीले भने सडक निर्माण भइसक्नुपर्ने समयमा नभएपछि जनताले असह्य भएकाले बाटो अवरुद्व गरेको बताए । ‘ठेकेदारको कमीकमजोरी र नगरपालिकाको सिस्टमका कारण अहिलेसम्म सडक नबनेको हो,’ उनले भने, ‘जनताले कति सहने ? समयावधिमा काम नगरेपछि नगरपालिकाले पनि एक्सन लिन सक्नुपर्छ ।’ आँफूहरूले इटहरी नगरप्रमुख हेमकर्ण पौडेललाई पनि यस विषयमा पटकपटक जानकारी गराएको उनले बताए । ‘नगरपालिकामा जानकारी गराउँदा भोलिबाट, हप्तादिनबाट काम सुरु गर्ने कुरा आयो, अहिलेसम्म काम नै सुरु नभएपछि स्थानीयबासीमा असह्य भयो,’ वडाध्यक्ष चौधरीले भने, ‘बहुवर्षे योजना अन्तर्गत अघिल्लो आर्थिक वर्ष नै ठेक्का लागेको सडक हो, अब कालोपत्रेका लागि नगरपालिकाले नै एक्सन लिनुपर्छ ।’ उनका अनुसार करीब ८६ लाख बजेटमा उक्त सडक निर्माणका लागि गिरी कन्ट्रक्सनले ठेक्का लिएको हो ।