बेलबारीका विद्यालय व्यवस्थापन समितिका अध्यक्षद्वारा सामूहिक राजीनामा

बेलबारी: मोरङको एक स्थानीय तहमा शिक्षा समितिको सिफारिस र कार्यपालिकाको निर्णय अत्यन्तै त्रुटिपूर्ण रहेको साथै दरबन्दी मिलानको गर्ने नाममा विद्यालयको हित विपरीत कार्य गरेको भन्दै सामुदायिक विद्यालय व्यवस्थापन समितिका अध्यक्ष द्वारा सामूहिक राजीनामा दिएका छन् । सोमवार बेलबारी नगरपालिका स्थित मेयर दिल प्रसाद राईलाई राजीनामा पत्र बुझाउँदै नगरपालिकाको शिक्षा समितिले कुनै पनि विद्यालयका व्यवस्थापन समिति सँग समन्वय नगरी आग्रह पूर्वाग्रहका साथ सरुवा गरिएको घटना प्रति आपत्ति रहेको काली माध्यमिक विद्यालयका व्यवस्थापन समिति अध्यक्ष नगेन्द्र खड्काले बताए । नगर प्रमुख सँग पटक पटक छलफलका क्रममा नयाँ शैक्षिक सत्र सुरु भएको दुई हुन लाग्दा हालको अवस्थामा दरबन्दी मिलानका कुरा, दरबन्दी हटाउने कुरा वैज्ञानिक नरहेको र ऐन विपरीत समेत रहेको हामीले बताउँदै गर्दै समेत हाम्रो कुरा सुनुवाइ नभएपछि हमिले संयुक्त रूपमा राजीनामा दिन बाध्य भएको अध्यक्ष खड्काले बताए । सामुदायिक विद्यालयहरूलाई समाप्त पार्ने उद्धेस्यका साथ नगरपालिका शिक्षा समितिले गलत निर्णय लिएको हुनाले यही अवस्थामा समितिमा बस्न नसक्ने ठहरको साथ सामूहिक राजीनामा दिइएको विज्ञप्तिमा उल्लेख छ । उक्त विज्ञप्तिमा एघार विद्यालय व्यवस्थापन समितिको हस्ताक्षर रहेको छ । बेलबारीमा ३१ सामुदायिक विद्यालय रहेका छन् । तर शिक्षा शाखा बेलबारीकी प्रमुख एलिना बस्नेतले भने नियमले भेटे अनुसार मात्र दरबन्दी मिलान गरिएको बताइन् । उनले दरबन्दी मिलानको कार्यदल नै बनाएर प्रक्रिया अघि बढाइएको बताइन् । विभागले जारी गरेको परिपत्र अनुसार विद्यार्थी सङ्ख्या र स्थलगत निरीक्षणका क्रममा दरबन्दी मिलानको लागी कार्यपालिकामा सिफारिस गरिएको प्रमुख बस्नेतले बताइन् ।