काठमाडौँ । नेपाली काँग्रेसका केन्द्रीय सदस्य ननसिंह महरले सरकार निर्माण हुँदाको सात बुँदे सहमति अनुसार चल्न नसकेको गुनासो गरेका छन्।
१०० दिने विशेष अभियानअन्तर्गत काँग्रेस नगर कार्यसमिति सूर्योदय नगर पालिका इलामले आयोजना गरेको कार्यक्रममा शिक्षा विभाग प्रमुखसमेत रहेका महरले उक्त कुरा बताएका हुन्।
'सरकार गठन भएको पाँच महिना बित्दा पनि गठबन्धनको स्पिड अनुसार चल्न सकेको छैन। यसले काँग्रेसको घोषणा पत्रलाई पनि धेरै ध्यान दिएको देखिँदैन।
काङ्ग्रेस-एमालेबीच गठबन्धन हुँदै गर्दा जनतामाझ व्याप्त निराशालाई आसामा परिणत गर्ने प्रतिबद्धता प्रधानमन्त्री केपी शर्मा ओलीले संसद्मा व्यक्त गर्नु भएको थियो,' महरले भने, 'त्यस अनुरूप काम देखिएन। प्रतिबद्धता अनुसार काम नहुँदा पुनः जनतामा वितृष्णा फैलिने हो कि भन्ने डर बढ्न थालेको छ।'
त्यसैले वर्तमान सरकारलाई सात बुँदे सहमति कार्यान्वयनबाट पछि हट्ने छुट् नभएको उनले औँल्याए। 'काँग्रेस संसद्को ठुलो दल हो। काँग्रेसको ओज र स्थितिलाई ध्यान नदिएर सरकार काँग्रेसको तेजोवध हुने गरी अगाडि बढिरहेको आभाससमेत हुन थालेको छ। सरकार काँग्रेसको गरिमा घटाउने गरी अगाडि बढिरहेमा समीक्षा हुनसक्छ,' महरले भने।
यति बेला काँग्रेस जनताको भावना बुझ्न १०० दिने अभियानका माध्यमबाट जनताको घर दैलोमा रहेको र पार्टीप्रति थुप्रै सुझाव तथा आसा पाइएको उनले दाबी गरे। 'हामीले देशभर जनतासँग काँग्रेस, सरकार र विकासका बारेमा संवाद तथा समीक्षा गरेका छौँ। १६ पुसमा काँग्रेसको १०० दिने अभियान सकिएपछि हामी सरकारको बारेमा जनताले काँग्रेसलाई दिएको सुझाव अनुसार सत्ता सहयात्राबारे केन्द्रीय समिति बैठकमा समीक्षा गर्न सक्छौँ,' उनले भने।
त्यसैले सरकारलाई अपेक्षा अनुसार चल्न उनको सुझाव छ। देशका दुई ठुला शक्ति एक ठाउँमा आउँदा सुरुमा जनतामा ठुलो आसा रहे पनि बिस्तारै निराशामा परिणत भइरहेको आफूले १०० दिने अभियानका क्रममा देशका विभिन्न भूभागमा पुग्दा पाएको महरको भनाइ छ। उक्त निराशालाई आसामा परिणत गर्न सरकार सहमति अनुसार अगाडि बढ्नुपर्ने उनले बताए।
युनिकोड
मिति रूपान्तरण
प्रदेश खबर
प्रतिक्रिया