नुवाकोट : नेपाली कांग्रेसका प्रवक्ता तथा पूर्व अर्थमन्त्री डा. प्रकाश शरण महतले कांग्रेसले गरेका उल्लेखनीय कार्यकै कारण नेपालकै सर्वश्रेष्ठ पार्टी भएको दाबी गरेका छन्। उनले कांग्रेस नेतृत्वमा भएका विकास निर्माणका काम अन्य कुनै पनि दलसँग तुलना गर्न नसकिने बताएका छन्।
शुक्रबार नेपाली कांग्रेस नुवाकोटको शिवपुरी गाउँपालिकाको प्रथम सम्मेलनलाई सम्बोधन गर्दै प्रवक्ता महतले कांग्रेस नेतृत्वमा देशभर विकासका महत्वपूर्ण काम भएको स्मरण गराए। साथै, उनले आगामी निर्वाचनमा नुवाकोटबाटै प्रत्यक्ष उम्मेदवार बन्ने घोषणा गरे।
डा. महतले विगतमा आफूले प्रत्यक्ष चुनाव लड्न नपाए पनि नुवाकोटमा विभिन्न विकास निर्माणका काम गराएको दाबी गरे। "मैले प्रत्यक्ष चुनाव नलडेर पनि नुवाकोटमा धेरै विकासका काम गरें। अब आगामी चुनावमा नुवाकोटबाटै प्रत्यक्ष उम्मेदवार बन्नेछु," उनले घोषणा गरे।
उनले कांग्रेसलाई कुरामा भन्दा काममा विश्वास राख्ने पार्टीको रूपमा चित्रित गर्दै, पार्टीका नेताकार्यकर्तालाई कांग्रेसका उपलब्धिहरू प्रचार गर्न आग्रह गरे।
डा. महतले वर्तमान माओवादी केन्द्रको नेतृत्वमा रहेको सत्तारूढ गठबन्धन अस्थिर भएको आरोप लगाए। उनले भने, "कांग्रेस–एमाले गठबन्धनको सरकारले देश र जनतालाई उच्च प्राथमिकतामा राखेर काम गर्नुपर्छ।"
उनका अनुसार स्थायित्व, विकास, र समृद्धिका लागि कांग्रेसको नेतृत्व अपरिहार्य छ। कांग्रेसकै अगुवाइमा देशले स्थिरता र आर्थिक प्रगति हासिल गर्ने उनको दाबी छ।
प्रवक्ता महतको प्रत्यक्ष निर्वाचनको घोषणाले नुवाकोटको आगामी राजनीतिक परिदृश्यमा नयाँ मोड आउने संकेत गरेको छ।
प्रदेश खबर
_DEhQO4lE8f.png)
_mojlZ6X9mp.png)
प्रतिक्रिया