गिज्याइरहेको इटहरी : जेनजी आन्दोलनपछिका भग्नावशेष अझै उठेनन्

इटहरी : जेनजी आन्दोलनको उथलपुथलबाट इटहरी झस्किएको आज ठिक दुई महिना पूरा भएको छ।

गत भदौ २४ गतेको आन्दोलनका क्रममा ध्वस्त पारिएका इटहरी उपमहानगरपालिकाका संरचना, सवारीसाधन र सडकछेउका सम्पूर्ण अवशेष अझै पनि सफाइको प्रतीक्षामा छन्।

उपमहानगर प्रवेश गर्नासाथै ध्वस्त सवारीसाधन र छरिएका फोहोरका थुप्राहरू सहजै देखिन्छन्। यी भग्नावशेष र फोहोरले इटहरीको सौन्दर्यलाई निस्तेज बनाएको स्थानीयवासीको गुनासो छ।

उपमहानगरपालिकाका सम्पूर्ण क्षतिग्रस्त सामग्रीको सर्जमिन मुचुल्का तयार भइसकेको छ । उच्चस्तरीय जाँचबुझ आयोगका पदाधिकारीले घटनास्थल निरीक्षणसमेत गरिसकेका छन् । तर पनि आन्दोलनपछिको व्यवस्थापनमा स्थानीय सरकार सुस्त देखिएको छ ।

दुई महिनापछि पनि नगरकै मुटुमा छरिएका फोहोर र कवाडहरूले इटहरीलाई गिज्याइरहेका छन् । आन्दोलनको पीडा त बिर्सिँदै छ, तर त्यसले छोडेको दाग अझै मेटिएको छैन ।