उपमहानगरको छैन अनुगमन-इटहरीका सडकमै निर्माण सामाग्री राख्दा दुर्घटनाको जोखिम  

यसरी सडक किनारा वा आधा सडक नै ढाकेर निर्माण सामाग्री राख्दा पैदल यात्रुहरूलाई समेत समस्या हुने गरेको स्थानीय विनीता पौडेलको भनाइ छ । ‘सडक किनारामा समानहरू छन्, बिच बाटोबाट हिँड्दा सफारीले हान्छ कि भनेर डर हुन्छ,’ उनले भनिन् । 

महिनौँसम्म घर बनाउन बाटोमा समान राख्दा पनि इटहरी उपमहानगरपालिकाले चासो नदिएको उनको गुनासो छ । यता, निर्माण सामाग्री सडकमा नराख्न इटहरी उपमहानगरपालिकाले पटक पटक सूचना जारी गर्दै आइरहेको छ । 

यस विषयमा इटहरी उपमहानगरपालिकाका नगर प्रहरी प्रमुख जेबी राईले सडकमा रहेका निर्माण सामाग्रीहरू चाँडै हटाउन सुरु गरिने बताए ‘इटहरीमा भर्खरै नगर प्रहरी भर्ना गरिएको छ, नयाँ नगर प्रहरीको तालिम सम्पन्न भएपश्चात् सक्रिय भएर यसरी सडकमा राखिएका निर्माण सामाग्रीहरू हटाउँछौँ ।’ उनले भने ।