मजदुर संगठनको सुझावपछि मधेस प्रदेशका भौतिक पूर्वाधार मन्त्री भन्छन् – सडक सुरक्षा सरकारको प्राथमिकतामा छ

जनकपुर : मधेस प्रदेशका भौतिक पूर्वाधार विकास मन्त्री सरोजकुमार यादवले सडकमा हुने दुर्घटना न्यूनीकरण गर्न प्रदेश सरकारको प्राथमिकतामा रहेकाले नेपाल यातायात स्वतन्त्र मजदुर संगठनको अभियानमा सहयोग र सहकार्य गर्ने बताएका छन् । शनिबार मन्त्री आवासमा संगठनका अध्यक्ष भीमज्वाला राईसहितको प्रतिनिधि मण्डलले सडकमा हुने दुर्घटना महामारी झैँ भइरहेको प्रत्येक दिन सातदेखि आठजनाको निधन हुने र प्रत्येक दिन ४० जना नागरिक दुर्घटनामा घाइते भइरहेको तथ्य प्रस्तुत गर्दै यसलाई रोक्न नीति र व्यवहारिक सुधारको जरूरी रहेको सुझाइएको थियो । सो क्रममा मन्त्री यादवले सडक सुरक्षा जनताको सुरक्षासँग जोडिएकाले प्रदेश सरकार जिम्मेवार रहेको बताउँदै सडक प्रयोगकर्ताहरूलाई सचेतना अभियान सञ्चालन गर्ने सरकारको तयारी रहेको बताए । संगठनको सुझावलाई ग्रहण गर्दै अभियान सञ्चालन गरिने मन्त्री यादवको भनाइ छ । मधेश प्रदेशको पूर्वपश्चिम सडक जोडिएको आठवटै जिल्लामा सरोकारवालाहरू सम्मिलित सडक सुरक्षा सचेतना अभियान सञ्चालन गर्नुपर्ने संगठनले सुझाएको थियो । त्यसका लागि सरकारले बजेट विनियोजन गर्न सरकारलाई संगठनले सुझाव प्रस्तुत गरेकोमा मन्त्री यादव सकारात्मक रहेको संगठनका अध्यक्ष भीमज्वालाल राईले बताए । निर्माणाधीन जनकपुर बसपार्क समयमै निर्माण सम्पन्न नहुँदा वर्षौदेखि यातायात मजदुरहरूले दुःख पाइरहेकोसमेत मन्त्री यादवलाई जानकारी गराइएको थियो । बसपार्क निर्माणाधीन रहेकाले माटो, धुलो, खाल्डोहरू रहेकाले वर्षाका समय पानी जमेर हिलो भएर र घाम लागेको समय धुलोले बसपार्कमा काम गर्न समस्या रहेको नेपाल यातायात स्वतन्त्र मजदुर संगठन मधेश प्रदेश अध्यक्ष अनिरुद्र झाले जानकारी गराएका थिए । भेटमा मन्त्री यादवले चाँडै बसपार्क अनुगमन गरी निर्माण कार्यलाई चाँडै सम्पन्न गर्न पहल गर्ने प्रतिबद्धता जनाए । मन्त्रीलाई भेट्न संगठनका अध्यक्ष राईसहित लोकतान्त्रिक यातायात व्यवसायी संगठनका मधेश प्रदेश अध्यक्ष रामनरेश सिंह, नेपाल यातायात स्वतन्त्र मजदुर संगठनका मधेश प्रदेश अध्यक्ष अनिरुद्र झा, कोषाध्यक्ष अर्जुन झा, टेंकर इकाई अध्यक्ष जोगी यादवलगायत सहभागी थिए ।