विज्ञापन प्रकाशनमा भ्रष्टाचार, नगरपालिकाका कर्मचारीसहित पत्रिकाका सम्पादक र सञ्चालकविरुद्ध मुद्दा दायर

काठमाडौँ । अख्तियार दुरुपयोग अनुसन्धान आयोगले रौतहटको फतुवा विजयपुर नगरपालिकाका तत्कालीन प्रमुख प्रशासकीय अधिकृत शम्भु कुमार यादव, जनसवाल राष्ट्रिय दैनिकका सम्पादक, तराई पोस्टका प्रतिनिधि र प्रकाशकसमेत ५ जना उपर गैर कानुनी लाभ तथा हानी पुर्‍याई भ्रष्टाचार गरेको सम्बन्धी आरोप पत्र दायर गरेको छ ।

अख्तियारले नगरपालिकाको विज्ञापन छपाईमा अनियमितता गरेको भन्दै फतुवा विजयपुर नगरपालिकाका तत्कालीन प्रमुख प्रशासकीय अधिकृत यादव, तत्कालीन सह-लेखापाल नवीन कुमार यादव र तराई पोस्टका प्रतिनिधि ओम प्रकाश यादवविरुद्ध २ लाख १२ हजार २२५ अनियमितता गरेको आरोप लगाएको छ भने जनसवाल पब्लिकेशन प्रा.लि.तथा उक्त कम्पनीका सम्पादक रामजी बगाले विरुद्ध एक लाख ७२ हजार ८२५ अनियमितता गरेको आरोप लगाएको छ ।

 त्यस्तै तराई पोस्टका प्रकाशक रुपेन्द्र पटेलविरुद्ध ३९ हजार ४०० अनियमितता गरेको आरोप लगाएको छ ।

अख्तियारले पत्रिकामा बोलपत्र प्रकाशित गर्ने भने पनि सो दिनको पत्रिकाको रेकर्डमा बोलपत्र प्रकाशित भएको नदेखिएको तर सो बमोजिमको भुक्तानी लिएको आरोप पत्रमा उल्लेख छ ।