कोशी प्रदेशको ३७ अर्बको बजेट आज सार्वजनिक हुँदै, स्रोत अभाव हुदाँ 'तानतुन'को प्रयास

विराटनगर । कोशी प्रदेश सरकारले आगामी आर्थिक वर्ष २०८२/०८३ का लागि करिब ३७ अर्बको बजेट ल्याउने तयारी गरेको छ। यद्यपि, वास्तविक आन्तरिक स्रोत भने ३३ अर्ब बराबर मात्रै रहेको मुख्यमन्त्री हिक्मतकुमार कार्कीले स्पष्ट पारेका छन्। उनले बजेट 'तानतुन पारेर' तयार पारिएको बताएका छन्।

प्रदेशको आगामी वर्षको बजेट आज (आइतबार) दिउँसो ३ बजे प्रदेशसभा बैठकमार्फत सार्वजनिक हुँदैछ। आर्थिक मामिला तथा योजना मन्त्री रामबहादुर मगरले बजेट प्रस्तुत गर्ने कार्यक्रम रहेको छ। चालु आर्थिक वर्ष २०८१/८२ मा पनि मगरकै नेतृत्वमा ३६ अर्ब २४ करोड ३५ लाखको बजेट ल्याइएको थियो।

शनिबार झापाको गौरादहमा आयोजित कार्यक्रममा मुख्यमन्त्री कार्कीले कोशी प्रदेशको बजेट वर्षेनी घट्दै गएको र स्रोतको अभावमा आगामी बजेट निर्माण कठिन भएको बताए। ‘अहिले हामीसँग ३३ अर्ब बराबरको मात्र स्रोत छ,’ उनले भने, ‘तर आवश्यकतालाई ध्यानमा राखेर तानतुन पारेर ३७ अर्बको बजेट तयार पारिरहेका छौं।’

यस पटकको बजेटमा सांसदका लागि छुट्याइएको रकम पनि सार्वजनिक भएको छ। आर्थिक मामिला तथा योजना मन्त्रालय स्रोतका अनुसार प्रत्यक्ष निर्वाचित सांसदलाई २ करोड ५० लाख र समानुपातिक सांसदलाई १ करोड ५० लाखका दरले बजेट छुट्याइएको छ। यो रकम भौतिक पूर्वाधार विकास मन्त्रालयमार्फत सांसदले प्रस्ताव गरेका योजनाहरूमा खर्च गरिने जनाइएको छ।