पारित भयो कोशी प्रदेशको बजेट

विराटनगर ।  कोशी प्रदेश सरकारले आगामी आर्थिक वर्षका लागि ल्याएको बजेट पारित भएको छ । शुक्रबारको प्रदेश सभा बैठकबाट २०८२–८३ का लागि प्रदेश सभामा प्रस्तुत गरेको बजेट पारित भएको हो ।

१ असारमा सरकारले ३५ अर्ब ८७ करोड ९९ लाख रुपैयाँको बजेट प्रस्तुत गरेको थियो । छलफलपछि शुक्रवार बहुमतले पारित गरेको हो ।

आगामी आर्थिक वर्ष २०८२–८३ को विनियोजन विधेयकमाथिको छलफलमा ३८ जना सांसदले सहभागिता जनाएका थिए ।

आगामी आर्थिक वर्षका लागि सरकारले चालुतर्फ १८ अर्ब ६७ करोड ३३ लाख र पुँजीगततर्फ १७ अर्ब १० करोड ६५ लाख रुपैयाँ विनियोजन गरेको थियो ।

जसमध्ये आन्तरिक राजस्वबाट ५ अर्ब ५० करोड, राजस्व बाँडफाँटबाट १२ अर्ब ३९ करोड हुने अनुमान छ ।

बाँकी सङ्घीय सरकारबाट प्राप्त हुने अनुदानबाट व्योहोरिने अनुमान छ ।

बजेट साउन १ गतेदेखि  कार्यान्वयन हुनेछ ।