पहिरोले मध्यपहाडी लोकमार्ग अवरुद्ध, बोलबमका लागि हलेसी आउने तीर्थालु अलपत्र

खोटाङ : लगातार वर्षाका कारण पहिरो जाँदा मध्यपहाडी लोकमार्गअन्तर्गत जयराम–हलेसी सडकखण्ड अवरुद्ध भएको छ। हलेसी तुवाचुङ नगरपालिका–३ च्यास्मिटारमा आज बिहान सडकभन्दा करिब १०० मिटरमाथिबाट पहिरो झर्दा जयराम–हलेसी सडक पूर्णरूपमा अवरुद्ध भएको हो।

सडक अवरुद्ध भएपछि काठमाडौं तथा तराई जाने/आउने यातायातका सवारीसाधन र यात्रुबिच सडकमै अलपत्र परेका छन्। जयराम–हलेसी सडक अवरुद्ध हुँदा 'बोलबम' का लागि हलेसी आउने तीर्थालु पनि बिच सडकमै अलपत्र परेका छन्।

करिब १०० मिटर सडक पुर्नेगरी झरेको पहिरो पन्छाउन समय लाग्ने भएपछि उताबाट आउने यातायातका साधन जयराममा र यता (दिक्तेल) बाट जानेलाई दुर्छिममा रोकिएको जिल्ला प्रहरी कार्यालय खोटाङका निमित्त प्रमुख प्रहरी निरीक्षक सुशान्त मिश्रले जानकारी दिए। पहिरोका कारण जयराम–हलेसी सडक अवरुद्ध हुँदा सबैभन्दा बढी त्रिधार्मिकस्थल हलेसीमा लागेको बोलबम मेला भर्न आउने भक्तजनलाई समस्या भएको स्थानीयले बताएका छन्।

साउन महिनाको अन्तिम सोमबार भएकाले हलेसी आवतजावत गर्ने तीर्थालुको संख्या पनि बढी हुने अवस्थामा च्यास्मिटारमा पहिरो जाँदा समस्या सिर्जना भएको हलेसी तुवाचुङ नगरपालिकाका प्रवक्ता एवम् वडा नं ७ महादेवस्थानका वडाध्यक्ष कमल गिरीले जानकारी दिए। 'जयराम–हलेसी सडकखण्डमा ठूलो पहिरो जाँदा धेरै तीर्थालु बिच सडकमै अलपत्र परेका छन्। तिनलाई उद्धार गर्न सबै संयन्त्र परिचालन गरिएको छ,' उनले भने, 'लगातार वर्षा नरोकिँदा सम्भव भएको छैन। बेलुकासम्ममा पुनः सञ्चालनमा ल्याउनेगरी पहिरो हटाउने काम भइरहेको छ।'

केही दिनदेखि परिरहेको अविरल वर्षाका कारण आज बिहान ८ बजेर करिब १० मिनेट जाँदा च्यास्मिटारमा पहिरो खसेको प्रहरीले जनाएको छ। च्यास्मिटारमा खसेको पहिरोले दाम्ली–डिकुवा सडक पनि अवरुद्ध भएको स्थानीयले बताएका छन्।

अवरुद्ध सडक खुलाउन हलेसी तुवाचुङ नगरपालिका र मध्यपहाडी लोकमार्गको स्काभेटर प्रयोग गरिएको नगरप्रमुख विमला राईले जानकारी दिए। 'पहिरो ठूलो छ। सडकमा थुप्रिएको ढुंगा, माटो र रुख हटाउने प्रयास भइरहेको छ,' उनले भने, 'अवरुद्ध सडक तत्काल खुलाउन सकिने अवस्था छैन। तैपनि, प्रयास जारी छ। यात्रा गर्नेले जानकारी लिएर मात्र यात्रा गर्नुहोला।'

हिन्दू, बौद्ध र किरात धर्मावलम्बीको सङ्गमस्थल हलेसीमा महिनादिनसम्म बोलबम मेला लाग्ने गर्छ। बोलबम मेला भर्नका लागि नेपालका सबै जिल्ला र भारत, चीन, भूटानलगायतका नागरिक पनि आउने गरेका छन्।