मोरङको उर्लाबारीमा जंगली च्याउ खाँदा एकै परिवारका पाँच जना बिरामी

विराटनगर । मोरङको उर्लाबारी नगरपालिका–१ मेचेडाँगीका एकै परिवारका पाँच जना जंगली च्याउ खाँदा बिरामी भएका छन्। बिरामी पर्नेमा ६९ वर्षीय लालबहादुर खड्का, उनकी ६८ वर्षीया पत्नी पवित्रा खड्का, छोराहरू ४२ वर्षीय शेरबहादुर खड्का र ३८ वर्षीय जंगबहादुर खड्का तथा २४ वर्षीया बुहारी जानुका खड्का रहेका छन्।

इलाका प्रहरी कार्यालय उर्लाबारीका अनुसार आइतबार जंगलबाट टिपेर ल्याइएको च्याउ पकाई खाएपछि राति उनीहरूमा स्वास्थ्य समस्या देखिएको हो। तत्काल उपचारका लागि सबैलाई झापाको दमकस्थित आम्दा अस्पताल लगिएको छ।

अस्पतालका चिकित्सकहरूका अनुसार बिरामीमध्ये शेरबहादुर र जानुकाको अवस्था मध्यम रहेको छ भने अन्यको अवस्था सामान्य छ। घटनाबारे थप अनुसन्धान भइरहेको प्रहरीले जनाएको छ।