रवि लामिछानेको कोठामा एसी छैन : मानवअधिकार आयोग

बुटवल : राष्ट्रिय मानवअधिकार आयोगका प्रतिनिधिहरूले राष्ट्रिय स्वतन्त्र पार्टी (रास्वपा)का सभापति रवि लामिछाने रहेका रुपन्देही कारागारको कोठामा वातानुकूलित एसी नभएको र झ्याल प्लाइउडले टालिएको पाएको बताएका छन्।

कारागारको अनुगमनपछि आयोगका प्रतिनिधिहरूले कारागारभित्र आधारभूत सुविधाको अभाव रहेको टिप्पणी गरेका छन्। आयोगकी प्रवक्ता लिली थापाका अनुसार कारागारमा क्षमताभन्दा धेरै कैदीबन्दी रहेका छन्, पर्याप्त शौचालय छैनन् र रहेका शौचालयहरूको अवस्था पनि राम्रो छैन।

थापाले लामिछाने रहेको ब्लकको झ्याल टालिएकाले हावा आवतजावतमा समस्या देखिएको बताइन्। कोठामा एउटा चाइनिज पंखा र अर्को पार्टी प्यालेसमा प्रयोग हुने ठूलो पंखा रहेको पनि उनले जानकारी दिइन्।